कोरोना संक्रमण भएको कैयन दिनसम्म आउनसक्छ नेगेटिभ रिपोर्ट
यदि तपाईको कोरोना परीक्षणको रिपोर्ट एकपटकमा नेगेटिभ आयो भने पनि तपाई संक्रमण नभएको भनेर ढुक्क हुनसक्ने अवस्था नरहने चिकित्सकहरुले बताएका छन् । अमेरिकाकी इमर्जेन्सी मेडिसिन फिजिसियन डाक्टर लिना वेनले कोरोनाको भाइरस सरेको १४ दिनसम्म पनि नेगेटिभ रिपोर्ट आउनसक्ने बताएकी छिन् ।
कोरोनाको उष्मायन अवधि १४ दिनसम्म भएकाले कसैलाई कोरोना भाइरस सरेपनि परीक्षण गर्दा १४ दिनसम्म नेगेटिभ रिपोर्ट आउनसक्ने र कुनै लक्षण समेत नदेखिएको हुनसक्ने उनको भनाई छ । तर यस्तो अवधिमा समेत व्यक्तिले कोरोना अर्को व्यक्तिमा सार्नसक्ने जनाइएको छ ।
चिकित्सकका अनुशार यदि हिजो कोही व्यक्ति संक्रमित भएको छ भने आजै त्यसको रिपोर्ट पोजेटिभ नआउनसक्छ । मेडिकल जर्नलमा प्रकाशित एउटा रिपोर्ट अनुशार कोरोना संक्रमित कैयन व्यक्तिको रिपोर्ट भने नेगेटिभ आएको जनाइएको छ । अध्ययनमा कोरोना भाइरस सरेको ४ दिनसम्म वा लक्षण देखिनुभन्दा ४ दिन अगाडिसम्म रिपोर्ट नेगेटिभ आउने गरेको पाइएको छ । सरेकै दिनको शतप्रतिशत नेगेटिभ आएको रिपोर्टमा उल्लेख छ ।
व्यक्तिमा लक्षण देखिन थालेपछि भने नेगेटिभ रिपोर्ट आउने प्रतिशत ३८ प्रतिशतमा झरेको जनाइएको छ । लक्षण देखिएको २ दिनपछि परीक्षण गर्दा २० प्रतिशतमा मात्र नेगेटिभ देखिएको गलत रिपोर्ट आएको जनाइएको छ ।
भाइरस शरिरमा प्रवेश गरेदेखि परीक्षणमा देखिनेसम्मको अवस्था आउनका लागि केहीदिनसम्म लाग्ने उक्त अध्ययनका बरिष्ठ लेखक तथा जोन हप्किन्सका एसोसिएट प्रोफेसर डाक्टर जस्टिन लेस्लरले बताएका छन् । कोरोना भाइरस सरेको कतिदिनपछि पोजेटिभ देखिन्छ भन्ने सन्दर्भमा कुनै नियम छैन तर सरेको तीनदिनभित्रको परीक्षण खासमा अर्थपूर्ण नहुने डाक्टर जस्टिन लेस्लरको भनाई छ ।
पहिलोपटक परीक्षण गर्दा नेगेटिभ देखिदैमा व्यक्तिले आफू खतरामुक्त रहेको सोंच्न नहुने मासाचुसेट्स जनरल अस्पतालका सरुवा रोग विभागका चिकित्सक रोशेल वालेन्सीले बताएकी छिन् । उनले संक्रमण भएको औषत ५ दिनमा लक्षण देखिने भएपनि कसैकसैलाई लक्षण देखिन १४ दिनसम्म लाग्ने बताइन् ।
अमेरिकाको सीडीसीले ४० प्रतिशत संक्रमितमा लक्षण नदेखिने बताएको छ भने ५० प्रतिशत संक्रमण लक्षण सुरु हुनुभन्दा अगाडि नै हुने गरेको छ ।
पीसीआर लगायतका मोलिक्युलर टेस्ट गर्दा नाकबाट वा घाँटीबाट स्वाब संकलन गरिन्छ । कहिलेकाँही यो परीक्षणमा र्यालको समेत प्रयोग गरिन्छ । यो परीक्षणको नतिजा प्राय सही आउने र दोहोराएर परीक्षण गर्न पर्ने अवस्था कम हुने बताइन्छ ।
तर र्यापिड टेस्टका रुपमा चिनिने एन्टीजेन परीक्षण कहिलेकाँही सही नहुने बताइन्छ । यो परीक्षणबाट एकघण्टामै नतिजा आउनसक्छ । कहिलेकाँही मोलिक्युलर परीक्षण पनि र्यापिड टेस्टका रुपमा गरेको पाइन्छ । यी विधिबाट परीक्षण गर्दा पोजेटिभ परिणाम आएमा विश्वास गर्न र नेगेटिभ आएमा पुन परीक्षण गराउन एफडीएले सुझाव दिएको छ ।
