न्युयोर्क सिटीमा लगातार तेश्रो दिन कोरोनाबाट मृत्यु शुन्य, क्वारेन्टीन लागु गर्न चेकप्वाइन्ट राखिने
प्रकाशित मिति : श्रावण २१, २०७७ बुधबार
न्युयोर्क सिटीले आफ्नो तीनदिने रेकर्डमा कोरोनाबाट मृत्यु हुनेको संख्या शुन्य रहेको उल्लेख गरेको छ । ब्रोंक्स र बु्रकलिनमा एकएकजनाको मृत्यु भएको पुष्टी भएपनि हरेक दिन सयौंको मृत्यु हुने अप्रिल महिनाको भयाभह अवस्थाबाट न्युयोर्कमा उल्लेख्य सुधार भइसकेको छ ।
राज्यब्यापी अस्पताल भर्ना हुने संख्या ५६४ मा झरेको छ । अप्रिल महिनामा यो संख्या २० हजारसम्म पुगेको थियो । कुल परीक्षणमध्ये झण्डै एक प्रतिशतमा मात्र कोरोना संक्रमण पुष्टी हुने दर एकसातादेखि कायमै रहेको छ । न्युयोर्क सिटीका ५ वटै बोरोमा पनि संक्रमणको न्यून दर कायमै रहेको छ । जबकी कुनै बेला कुल परीक्षणमध्ये ५९ प्रतिशतमा कोरोना संक्रमण देखिएको थियो ।
कुनै बेला कोरोनाको इपीसेन्टर रहेको क्वीन्समा अहिले परीक्षण गरिएकाहरुमध्ये जम्मा शुन्य दशमलव ८ प्रतिशतमा कोरोना संक्रमण देखिएको छ । क्वीन्समा कोरोना संक्रमणबाट कम्तीमा आधादर्जन नेपालीहरुको ज्यान गएको थियो भने सयौं नेपाली संक्रमित भएका थिए ।
यसैबीच न्युयोर्कसिटीका मेयर बिल डे ब्लाजिओले क्वारेन्टीनको नियम कार्यान्वयनका लागि न्युयोर्क सिटीका ५ वटै बोरोमा चेकप्वाइन्टहरु राखिने बताएका छन् । कोरोना संक्रमणदर उच्च रहेका स्थानबाट न्युयोर्क आउनेहरुलाई नियम कार्यान्वयन गराउनका लागि चेकप्वाइन्ट राखिने उनले बताएका छन् ।
न्युयोर्कमा पोर्तोरिको र ३४ राज्यबाट आउनेहरुलाई १४ दिन अनिवार्य क्वारेन्टीनमा बस्नुपर्ने नियम लगाइएको छ । वासिंटन डिसीलाई भने मंगलबार सुचीबाट हटाइएको छ । क्वारेन्टीन गम्भिर विषय रहेको सन्देश दिन चेकप्वाइन्ट राख्न लागिएको तर आफूहरुले मान्छेहरुलाई कारवाही होइन, नियम पालना गरेको सुनिश्चितताका लागि शिक्षित बनाउन चाहेको ब्लाजिओले बताएका छन् ।
न्युयोर्कका एयरपोर्टहरुमा अवतरण गर्ने यात्रुहरुले फर्म भर्न जरुरी हुन्छ । फर्म नभर्नेहरुलाई २ हजार डलरसम्म जरिवानाको व्यवस्था गरिएको छ । कार, ट्रेन र बसबाट आउनेहरुलाई पनि सोही नियम लागु भइररहेको छ ।
बिहिबारदेखि पेन स्टेशनमा चेक प्वाइन्टको सुरुवात गरिने भएको छ । फर्म भर्न सघाउनका लागि र मान्छेहरुलाई सुचित गर्नका लागि चेकप्वाइन्टको व्यवस्था गर्न लागिएको हो । अन्य चेक प्वाइन्टहरु पुल र टनेलहरुमा राखिनेछ । केही चेक प्वाइन्टहरु र्याण्डम तरिकाले राखिने जनाइएको छ ।