१४७ अर्बको इन्धन आयात, लकडाउनले १० प्रतिशत आयात घट्यो
प्रकाशित मिति : असार ३१, २०७७ बुधबार
यस वर्ष मुलुकमा १ खर्ब ४७ अर्ब रुपैयाँ बराबरको २६ लाख किलोलिटर पेट्रोलियम पदार्थ आयात भएको छ । अघिल्लो वर्षको तुलनामा इन्धन आयात १० प्रतिशत घटेको हो।
गत वर्ष १ खर्ब ९२ अर्ब रुपैयाँ बराबरको २९ लाख किलोलिटर आयात भएको नेपाल आयल निगमले जानकारी दिएको छ । यो वर्ष निगमले इन्धन खरिद गरे बापत इन्डियन आयल कर्पोरेसन (आईओसी) लाई एक खर्ब ४७ अर्ब रुपैयाँ बुझाएको हो । अन्तर्राष्ट्रिय बजारमा इन्धनको मूल्य घटेको र कोभिड–१९ को असरले मुलुक लकडाउन हुँदा इन्धन आयात घटेको हो ।
निगमका नायव कार्यकारी निर्देशक नागेन्द्र साहले यो वर्ष अन्तर्राष्ट्रिय बजारमा मूल्य घटेको र लकडाउनका कारण इन्धन आयात कम भएको जानकारी दिए । यो वर्ष आयातमा १० प्रतिशतले घटेर १ खर्ब ४७ अर्ब रुपैयाँ इन्धन आयात भएको साहको भनाई छ । यो वर्ष डिजेल, पेट्रोल, हवाई इन्धन, मट्टितेल र खाना पकाउने एलपी ग्यास गरेर २६ लाख किलोलिटर आयात भएको निगमको भनाइ छ । इन्धनमा नेपाल शतप्रतिशत भारतमा निर्भर छ । यस वर्ष इन्धन आयात घटेपछि व्यापार घाटा कम हुने भएको छ । झन्डै दुई खर्बको इन्धन आयात हुँदा यसले मुलुकको व्यापार घाटा बढाएको थियो ।
निगमको वार्षिक इन्धन कारोबार घटे पनि १० अर्ब ८६ करोड रुपैयाँ नाफा हुने निगमको अनुमान छ । गत वर्ष आठ अर्ब ७५ करोड रुपैयाँ नाफा कमाएको निगमको यो वर्ष दुई अर्ब ११ करोड रुपैयाँ नाफा बढेको हो। निगमले आव ०७३/७४ मा ९ अर्ब ४५ करोड, आव ७४/७५ मा ३ अर्ब ५८ करोड रुपैयाँ नाफा कमाएको थियो । निगमले चालू आर्थिक वर्ष करसहित दुई खर्ब ४० अर्ब रुपैयाँको कारोबार गरेको छ । गत वर्षको तुलनामा ३६ अर्ब रुपैयाँ कम कारोबार भएको हो ।
गत वर्ष २ खर्ब ७६ अर्ब रुपैयाँ कारोबार गरेको थियो । निगमले मूल्य वृद्धि गरेपछि विरोध भइरहेका बेला निगमले स्वचालित मूल्य प्रणाली अनुसार मूल्य समायोजन गरेको दाबी गरेको छ । निगमले एक वर्षको अवधिमा पाँचपटक मूल्य वृद्धि गरेको छ भने पाँचपटक मूल्य घटाएको छ । स्वचालित मूल्य प्रणाली अनुसार दुई रुपैयाँभन्दा बढी घटाउन नमिल्ने भए पनि अप्रिल १ तारिखमा सञ्चालक समितिबाट निर्णय गराएर लिटरमा १० रुपैयाँ मूल्य घटाएको थियो । अहिले पेट्रोल मूल्य लिटरमा एक सय दुई रुपैयाँ, डिजेल ८८ रुपैयाँ र एलपी ग्यासको मूल्य सिलिन्डरको एक हजार तीन ७५ रुपैयाँ रहेको छ ।-कारोबारबाट