न्युयोर्क सिटीले कागजपत्रविहिन परिवारलाई समेत एकएकहजार डलर दिने
न्युयोर्क सिटीमा कागजपत्रविहिनलाई समेत राहत दिन मेयर बिल ब्लाजिओले २० मिलियन डलरको कोष घोषणा गरेका छन् । ओपन सोसाइटी फाउण्डेशनसँगको सहकार्यमा जुनसुकै अध्यागमन स्टाटस भएकाहरु २० हजार आप्रवासी कामदारहरुलाई सहयोग उपलब्ध गराउन यो कोषको घोषणा गरिएको हो ।
आप्रवासीहरु न्युयोर्क सिटीका मुटु भएको र उनीहरु आफ्ना साथी र छिमेकीहरु रहेको मेयर ब्लाजिओले बताएका छन् । उनले जुनसुकै अध्यागमन स्टाटस भएकाहरुलाई समेत सहयोगका लागि साथ दिएकोमा ओपन सोसाइटी फाउण्डेशनलाई धन्यवाद दिएका छन् ।
न्युयोर्क सिटी कोभिड १९ को इपीसेन्टर रहेको र सिंगै देशका अन्य ठाउको तुलनामा सबैभन्दा धेरै संक्रमित भएको बताउँदै ओपन सिटी फाउण्डेशनका अध्यक्ष पेट्रिक ग्यासपार्डले आप्रवासीका सहयोगका लागि न्युयोर्क सिटीसँग सहकार्य गर्न पाएकोमा खुशी व्यक्त गरेका छन् । न्युयोर्क सिटीको मेयर कार्यालयको अध्यागमन अफेयर्सले समुदायमा आधारित संस्थाको नेटवर्क तयार गरेर कागजपत्रविहिन लगायतका आप्रवासी परिवारलाई एकमुष्ठ राहत दिन प्रकृया सुरु गर्ने भएको छ ।
सुरुमा काम गुमाएका र आर्थिक रुपमा समस्याग्रस्त २० हजार जनालाई यस्तो राहत प्रदान गरिनेछ । जसअन्तरगत एकलले ४ सय डलर, दम्पत्तिले ८ सय डलर र परिवारले एकहजार डलर प्राप्त गर्नेछन् ।
न्युयोर्क सिटीमामात्र ३ लाख ६० हजार कागजपत्रविहिन कामदारहरु रहेका छन् भने ४८ हजार कागजपत्रविहिन विजनेश संचालकहरु रहेका छन् ।
