बेलायतमा भेटिएका ३९ शव गैरकानुनी रुपमा युरोप छिर्ने आप्रवासीका भएको आशंका
प्रकाशित मिति : कार्तिक ६, २०७६ बुधबार
बेलायतको राजधानी लण्डन नजिकैको औद्योगिक पार्कमा रहेको एक ट्रकभित्र भेटिएका ३९ शव गैरकानुनी रुपमा युरोप छिर्ने आप्रवासीका भएको आशंका गरिएको छ । प्रारम्भिक अनुसन्धानपछि उक्त ट्रक बुल्गेरियाबाट बेलायत आएको उल्लेख गरिएको छ ।
यस्तो प्रकारको घटना पहिलो भने नभएको जनाइएको छ । यसभन्दा अगाडि पनि आप्रवासीहरुले ट्रकको डिब्बामा बसेर युरोप छिर्ने क्रममा ज्यान गुमाउदै आएका छन् । यसैबर्षको सुरुतिर हंगेरीको एउटा अदालतले मानवतस्करीमा संलग्न चारजनालाई आजिवन जेल सजाय सुनाएको थियो । अष्ट्रियामा छाडेर हिडेको एउटा ट्रकमा ७१ जना आप्रवासीको शव भेटिएपछि ४ जना मानवतस्कर फन्दामा परेका थिए ।
सन् २००० मा पनि यस्तै एउटा घटनामा बेलायती सिमाक्षेत्रमा ट्रकभित्र ५८ जना चाइनिजहरु मृत अवस्थामा भेटिएका थिए । उनीहरुलाई नेदरल्याण्डबाट ल्याउने क्रममा ट्रकको डिब्बामा राखिएको थियो । बेलायतको पछिल्लो घटनापनि मानवतस्करीसँग सम्बन्धित भएको आशंका गरिएको छ ।
ऐक्स प्रहरीका अनुसार लण्डनबाट पूर्वमा रहेको ग्रेजको पार्कमा भेटिएका सबै व्यक्तिलाई सोहीस्थलमा मृत घोषित गरिएको थियो । मृतकहरूमा ३८ जना बयस्क र एक किशोर रहेको प्रहरीको प्रारम्भिक जानकारीमा उल्लेख छ ।
घटनामा सम्लग्नता रहेको आरोपमा २५ बर्षीय उत्तरी आयरल्याण्डका यूवकलाई प्रहरीले पक्राउ गरेको छ ।
एसेक्स प्रहरीका प्रहरी प्रमुख सुपरिक्षक एन्ड्रु मारिनरले एक विज्ञप्ति जारी गरी घटनाबारे भन्नुभएको छ, “यो निकै दुःखद् घटना हो जसमा एकै स्थलमा ३९ व्यक्तिको मृत शरीर उद्धार गरिएको छ ।”
“घटनाबारे वास्तविकता खोज्न अनुसन्धान सुरू भइसकेको छ ।” प्रहरीका अनुसार घटनाबारे स्थानीय एम्बुलेन्सले आफूहरूलाई बिहान १ः४० जानकारी गराएको र प्रहरी तत्काल उक्त स्थानमा पुगेको थियो ।
मारिनरले भन्नुभयो, “हामीले मृतकको परिचय खुल्नेगरी अनुसन्धान प्रक्रियालाई अघि बढाएका छौ । तर यो केही लामो हुनसक्नेछ ।” प्रहरीको प्रारम्भिक अनुसन्धानका क्रममा गाडी बुल्गेरियाबाट आएको विश्वास गरिएको छ ।
उत्तरपश्चिमी राज्य वेल्स जानका लागि ट्रक शनिबार बेलायती भूमिमा प्रवेश गरेको विश्वास गरिएको छ । प्रहरीले ट्रक चालकलाई सुरक्षा नियन्त्रणमा लिई अनुसन्धान गरिरहेको छ, मारिनरले बताउनुभयो ।