अमेरिकी सैन्यलाई सिमाक्षेत्रमा गोली चलाउने अधिकार दिइएको गोप्य कागजात सार्वजनिक
प्रकाशित मिति : कार्तिक ५, २०७६ मंगलबार
अमेरिकी सैन्यलाई मेक्सिको सिमाक्षेत्रमा चलेका गाडीमाथि गोली चलाउन पाउने अधिकारसहितको गोप्य कागजात सार्वजनिक भएको छ । पेन्टागनको उक्त गोप्य दस्तावेज न्यूजवीकले प्राप्त गरेको हो, जसमा सैन्य शक्तिलाई सिमाक्षेत्रमा चलेका गाडीमाथि गोली चलाउन पाउने अधिकार दिइएको छ ।
सैन्य शक्तिलाई सिमाक्षेत्रमा चलेका गाडीले त्यसक्षेत्रमा सर्वसाधारणहरुलाई नोक्सान पुराउन सक्ने विश्वास लागेमा गोली चलाउनसक्नेछन् । अमेरिकी रक्षामन्त्रीले गत जुलाईमा सपथग्रहण गरेको तीनदिनपछि उक्त आन्तरिक निर्देशिका जारी गरिएको थियो । अमेरिकी सिमाक्षेत्रमा झण्डै ५५ सय सैन्य शक्तिलाई परचालनका लागि अनुमति दिइएको छ ।
अमेरिकी राष्ट्रपति डोनाल्ड ट्रम्पले सिमाक्षेत्रमा खटिने सीबीपीका अधिकारीहरुको संरक्षण र सहयोगका लागि सैन्य शक्ति परिचालनका लागि स्वीकृति प्रदान गरेका थिए । मध्य अमेरिकी देशहरुबाट अमेरिकातर्फ आएका आप्रवासीका हुलहरुले सिमाक्षेत्रमा हिंशा र अराजकता फैलाउन सक्ने भन्दै त्यसको नियन्त्रणका लागि सेना परिचालनको अवधारणा आएको थियो ।