दुईवटा जीप पहिरोमा पुरिए, एकको मृत्यु
प्रकाशित मिति : भाद्र २७, २०७६ शुक्रबार
सिद्धार्थ राजमार्गको तिनाउ गाउँपालिका २, दोभान नागथान नजिकै माथिबाट खसेको पहिरोले दुई वटा सवारी साधन पुरेको छ। घटनामा परी एक जनाको घटनास्थलमै मृत्यु भएको छ।
मृत्यु हुनेमा जीपका चालक कमल परियार रहेको प्रहरीले जनाएको छ । पुरिएको जीपबाट ६ जनाको उद्दार गरिएको छ। पाल्पाबाट बुटवल हिँडेको लु २ च ५९३८ स्कारपियो र बुटवलबाट पाल्पातर्फ आउँदै गरेको लु १ ज २६१७ नम्बरको जिप पुरिएका हुन्।
घाइतेहरुलाई उपचारका लागि लुम्बिनी अस्पताल बुटवलतर्फ लगिएको छ। पहिरोले अवरुद्ध सिद्धार्थ राजमार्ग सवारी संचालनका लागि प्रयास थालिएको दोभान प्रहरी चौकीले जनाएको छ।