अमेरिकाबाट डिपोर्ट गर्नुपर्ने व्यक्तिका सुचीमा १५२० जना नेपाली
प्रकाशित मिति : फाल्गुन ९, २०७३ सोमबार
-किशोर पन्थी
इमिग्रेशन एण्ड कस्टम इन्फोर्समेन्टको डिपोर्ट गर्नुपर्ने व्यक्तिका सुचीमा १५२० जना नेपालीहरु रहेको विभिन्न तथ्यांकले देखाएको छ । उनीहरुका ठेगानामा कुनै पनि बेला आइसका एजेण्टहरु पुग्न सक्छन् । उनीहरु पक्राउ पर्न सक्छन् । उनीहरुले टीपीएस लगायतका कुनै कागजात देखाएमा देशनिकाला हुनबाट बच्न सक्छन् । वा टीपीएसको अवधि सकिएपछि उनीहरु डिपोर्टमा पर्न सक्छन् । अन्यथा उनीहरु अहिले नै देशनिकालाको उच्च जोखिममा छन् ।
सन् २०१५ मा अदालतबाट देशनिकालाको आदेश पाउने नेपालीहरु १२८ जना थिए भने अदालतबाटै स्वेच्छिकरुपमा अमेरिका छाड्न आदेश पाउनेहरु १२ जना रहेका थिए । तर रिपोर्ट अनुशार ६ जना अपराध प्रमाणित भएका र १४ जना अपराध नगरेकासहित २० जना इमिग्रेशनको डिपोर्टमा परे भने ३९ जना अमेरिकाबाट फिर्ता भए । यसरी हेर्दा ८१ जना नेपालीहरुले सन् २०१५ मा अमेरिकाबाट डिपोर्टको आदेश पाइसकेपछि पनि अमेरिका छाडेनन् । उनीहरु अब आइसको निशानामा छन् ।
अमेरिकामा कागजपत्रविहिनहरुलाई इमिग्रेशन एण्ड कस्टम इन्फोर्समेन्ट आइसका एजेन्टले पक्राउ गर्न थालेपछि अमेरिकामा रहेका कागजपत्रबिहिन नेपालीहरु पनि आतंकित भएका छन् । इमिग्रेशन एण्ड कस्टम इन्फोर्समेन्ट आइसले अपराध गरेका कागजपत्रबिहिनहरुलाई मात्र नभई आपराधिक रेकर्ड नभएकाहरुलाई पनि छापा मारेर नियन्त्रणमा लिन थालेपछि नेपालीहरुमा थप त्रास बढेको हो । आइसले विभिन्न स्थानमा छापामारेर नियन्त्रणमा लिएकामध्ये २५ प्रतिशत व्यक्ति कुनै आपराधिक रेकर्ड नभएकाहरु पनि छन् ।
आप्रवासीहरुका लागि सुरक्षित भनिने स्यांचुअरी सिटीहरुमा आइसले गतिविधि तीब्र पारेपछि आप्रवासीहरुमा त्राहीमाम बढेको हो । इमिग्रेशन एण्ड कस्टम इन्फोर्समेन्ट आइसले पक्राउ परेकाहरुको राष्ट्रियता विवरण खुलाएको छैन । तर छापमार्ने क्रममा पक्राउ पर्नेहरुमा पनि नेपालीहरु पनि रहेको विभिन्न श्रोतहरुले जनाएका छन् । न्युयोर्कको लङ आइल्याण्डले इमिग्रेशन एण्ड कस्टम इन्फोर्समेन्ट आइसले पक्राउ गरेर केही घण्टा नियन्त्रणमा लिएपछि छाडिदिएको जानकारी आफूले प्राप्त गरेको न्युयोर्कका कानुन व्यवसायी रमेश श्रेष्ठले खसोखासलाई जानकारी दिनुभयो ।
आइसको निशानामा १५२० नेपाली
इमिग्रेशन एण्ड कस्टम इन्फोर्समेन्ट आइसले अपराध गरेकाहरु र अमेरिकी अदालतबाट डिपोर्टेशनको आदेश पाइसकेकाहरुलाई पनि निशानामा राख्दै आएको छ । अपराध गरेर अध्यागमन अदालतबाट डिपोर्टेशनको आदेश पाइसकेका व्यक्तिहरुको ठेगाना इमिग्रेशन एण्ड कस्टम इन्फोर्समेन्ट आइससँग पनि हुने भएकाले त्यस्ता ठेगानाहरुमा पुगेर छापा मारिएको छ भने कतिपय स्थानमा कार्यस्थलमा पुगेर समेत छापा मारिएका घटनाहरु सार्वजनिक भएका छन् ।
अध्यागमन अदालतबाट देशनिकालाको आदेश पाइसकेका तर विभिन्न कारणले अमेरिका नछाडेकाहरु अपराध नगरेको भएपनि आइसको निशानामा पर्ने गरेका छन् । विगत १८ बर्षको रेकर्ड हेर्दा इमिग्रेशन एण्ड कस्टम इन्फोर्समेन्ट आइसको निशानामा रहेका नेपालीहरुको संख्या १५२० रहेको डिपार्टमेन्ट अफ होमल्याण्ड सेक्युरिटी, एक्ज्युकेटिभ अफिस फर इमिग्र्रेशन रिभ्यु, इमिग्रेशन एण्ड कस्टम इन्फोर्समेन्ट आइस र युएससीआईएसबाट प्राप्त तथ्यांकले देखाएको छ । ती १५२० जना नेपालीहरु इमिग्रेशन अदालतबाट डिपोर्टको आदेश पाइसकेका तर विभिन्न कारणले अमेरिकाभित्रै लुकिछिपी वा खुलेआम बसिरहेकाहरु हुन् ।
उनीहरुमध्ये अधिकांशको ठेगाना इमिग्रेशन एण्ड कस्टम इन्फोर्समेन्ट आइससँग भएकाले उनीहरुका घरमा कुनैपनि बेला आइसका एजेण्टहरु छापामार्न आउन सक्छन् । उनीहरुले अदालतबाट देशनिकालाको आदेश पाइसकेपछि कुनै अध्यागमन सुविधाका लागि आवेदन नदिई त्यत्तिकै अमेरिकामा बसिरहेको सन्दर्भमा इमिग्रेशन एण्ड कस्टम इन्फोर्समेन्ट आइसले नियन्त्रणमा लिएको खण्डमा विना कुनै अवरोध डिपोर्ट हुनसक्ने जोखिममा छन् ।
अहिलेको सन्दर्भमा उनीहरुका लागि टीपीएस बरदान सावित भएको छ । यदि उनीहरुले टीपीएसका लागि आवेदन दिएको र प्राप्त गरेको खण्डमा भने उनीहरु पक्राउ पर्दा टीपीएसको कागजात देखाएर टीपीएसको अवधि सकिएपछिमात्र डिपोर्ट हुनेगरी तत्कालका लागि डिपोर्ट हुनबाट बच्न सक्छन् । यस्तो अवस्थामा उनीहरुको कुनै आपराधिक रेकर्ड भने हुनुहुँदैन । तर टीपीएसको लागि समेत आवेदन नदिएकाहरु भने डिपोर्ट हुने उच्च जोखिममा रहेका छन् । टीपीएस प्राप्त गरिसकेको भएतापनि इमिग्रेशन एण्ड कस्टम इन्फोर्समेन्टको रेकर्डमा ती १५२० जना नेपालीहरु देशनिकालाका लागि योग्य व्यक्ति (डिपोर्टेवल) को सुचीमा रहेकाले उनीहरुको घरमा कुनैपनि बेला आइसले छापामार्न सक्ने जनाइएको छ ।
को हुन् ती १५२० ? बिस्तारमा जान्न खसोखास साप्ताहिकको गत शुक्रबारको अंक हेर्नुहोला ।
सर्वाधिकार खसोखास साप्ताहिकमा सुरक्षित ।
