काठमाण्डौमा हावाहुरी र वर्षा
प्रकाशित मिति : जेष्ठ २३, २०७६ बिहीबार
काठमाण्डौ उपत्यकामा एकाविहानै हावाहुरी सहित वर्षा भएपछि जनजीवन प्रभावित भएको छ । हिजो बेलुकी कैलाली कञ्चनपुरमा भीषण हावाहुरीले तहस नहसका पारे लगत्तै उपत्यकामा हावाहुरी आएको हो ।
हावाहुरीले कुनै क्षति गरे नगरेकोबारे विवरण प्राप्त भएको छैन । तर सामाजिक संजालमा यसबारे त्रास व्यक्त गरिएको छ ।
हिजोमात्र पश्चिम नेपालका विभिन्न जिल्लामा आएको हावाहुरीले जनधनको ठूलो क्षति भएको छ । कैलालीमा एक जनाको मृत्यु भएको छ । जिल्ला प्रहरी कार्यालय कैलालीका अनुसार कैलालीको गोदावरीका बीरबहादुर थारुको मृत्यु भएको छ ।
कैलालीमा मात्र ५० जना भन्दा धेरै घाईते भएका छन् । हावाहुरीका कारण कैलाली, कञ्चनपुर, बाँके, बर्दिया र दाङमा हावहुरीले सयौं घर उडाएको छ । पानीसहितको हावाहुरीले सबैभन्दा धेरै असर कैलालीमा परेको छ । घाईतेको विभिन्न अस्पतालमा उपचार भैरहेको छ ।
कैलालीका प्रहरी उपरिक्षक सुदीप गिरीले अहिले विभिन्न ठाउँमा उद्दारको काम भैरहेको जनाएका छन् । हावाहुरीले कञ्चनपुरका विभिन्न बस्तीका नागरिक प्रभावित भएका छन् । हावाहुरीको असर बर्दिया, बाँके र दाङसम्म परेको छ ।
घाईते मध्य केहीको अवस्था गम्भीर छ । रुख ढलेकाले ठाउँ ठाउँमा सडक अवरुद्ध भएको छ । हावाहुरीले गर्दा बिजुली बत्ति गएको छ भने मोबाइल नेटवर्क समेत ठाउँ ठाउँमा अवरुद्ध भएको छ ।