युरोप भ्रमणमा जाँदै प्रधानमन्त्री ओली, नेपालको स्याटेलाइटबारे सम्झौता हुनसक्ने
प्रधानमन्त्री केपी शर्मा ओली आगामी साता युरोप भ्रमणमा जाने भएका छन् । उक्त भ्रमणका क्रममा फ्रान्सको एउटा कम्पनीसँग नेपालको भूउपग्रहबारे सम्झौता हुनसक्ने जनाइएको छ । नेपाल दूरसञ्चार प्राधिकरणले उक्त सम्झौतापत्रको खाका तयार पारिरहेको छ।
गत फागुनमा फ्रान्सको टालेस अलेनिया स्पेससँग अन्तर्राष्ट्रिय दूरसञ्चार संघ (आइटीयू) बाट पाएको आफ्नो ‘अर्बिटल स्लट’मा भू-उपग्रह राख्ने विषयमा आशयपत्रमा नेपालले हस्ताक्षर गरेको थियो। प्रम ओलीले आगामी आइतबारदेखि युरोप भ्रमण गर्ने कार्यक्रम रहेको छ।
सञ्चार तथा सूचना प्रविधि मन्त्री गोकुलप्रसाद बाँस्कोटाको गत फागुनमा फ्रान्स भ्रमणका क्रममा प्राधिकरण र उक्त कम्पनीबीच भएको समझदारी अनुसार आगामी सम्झौता हुन लागेको जनाइएको छ ।
नेपालमा लामो समयदेखि भू-उपग्रह राख्ने विषयमा चर्चामा रहदै आएको छ। तर त्यसका लागि ठोस काम भने नभएको कतिपय विज्ञले आरोप लगाउने गरेका छन्।
गत वैशाख ४ गते अमेरिकाबाट जापानको एक विश्वविद्यालयको सहयोगमा नेपाली विद्यार्थीले बनाएको एउटा सुक्ष्म भू-उपग्रह भने नेपालको झण्डा राखेर अन्तरिक्षमा पठाइएको थियो। उक्त भू-उपग्रहलाई नेपालको पहिलो स्याटलाइट भन्दै प्रचार गरिए पनि त्यसबाट खासै केही पनि सेवा लिन नसकिने वैज्ञानिकहरूले बताउँदै आएका छन्।
शुरूमा आफ्नै खर्चमा भू-उपग्रह राख्ने योजना अघि सारेको सरकारले १५ वर्षका लागि अन्तरिक्षमा राखिने भू-उपग्रहका लागि ठूलो रकम खर्च गर्नुपर्ने भएपछि साझेदार खोज्न थालेको थियो। नेपालले भूउपग्रह राख्नका लागि सुरुमै ३० अर्ब खर्च गर्नुपर्ने अनुमान छ । भूउपग्रह राखिसकेपछि पनि १५ वर्षभित्र अर्को ३० अर्ब रुपैयाँ खर्च हुने एउटा प्रतिवेदनमा उल्लेख थियो।
