अष्ट्रेलियाको एआइबिटी कलेज बन्द,सयौं नेपाली विद्यार्थी प्रभावित
प्रकाशित मिति : जेष्ठ १५, २०७६ बुधबार
अष्ट्रेलियाको इन्टरनेसनल इन्सिच्युट अफ विजनेश एन्ड टेक्नोलोजी (एआइबिटी इन्टरनेसनल) कलेज बन्द भएको छ ।
अष्ट्रेलियन सरकारको शैक्षिक निकाय अष्ट्रेलियन स्कील क्वालिटी एथोरोटी (आस्क्वा) ले मंगलबार एआइबिटी कलेजको दर्ता खारेजी गर्ने निर्णय गरेको हो ।
यो कलेजमा हजारभन्दा बढी नेपाली विद्यार्थी अध्ययन गरिरहेका थिए । अब उनीहरु अलपत्र परेका छन् ।
आस्क्वाको निर्णयलाई माथिल्लो निकायले पुनरावलोकन गरेमा भने एआईबीटीका विद्यार्थीले जोगिने छन् ।
गत फागुनमा पनि नर्सिङ सोसाइटी सम्बन्धन नलिएको र बिना रिफरेन्स विद्यार्थीलाई नर्सिङ डिप्लोमा भर्ना लिएका कारण द अष्ट्रेलिया इन्स्टिच्युट अफ विजनेस एन्ड टेक्नोलोजी कलेजलाई खारेज गरिएको थियो । यो प्रकरणमा हजारौं विद्यार्थी अलपत्र परेका थिए ।
एआइबिटी र एआइबिटी इन्टरनेसनल एकै स्वामित्वमा रहेका दुई छुट्टाछुट्टै कलेज हुन् ।
उच्च शिक्षा अध्ययनका लागि अष्ट्रेलिया पुगेका हजारौं नेपाली विद्यार्थी गलत सल्लाह र सुझावका कारण शैक्षिक अन्यौलमा पर्ने गरेको घटना सेलाउन नपाउँदै फेरि करिब एक हजार नेपाली विद्यार्थी अलपत्र परेका हुन् ।
यस्ता कलेजमा जान प्रबन्ध मिलाउने नेपालका परामर्शदाता, अध्ययनका लागि आपत्ति छैन भन्दै पत्र (नो अब्जेक्सन लेटर) दिने शिक्षा मन्त्रालय र त्यस्तो कलेजमा पढ्न भनी भिसा दिने अष्ट्रेलियन दूतावासको लापरवाहीले हजारौं विद्यार्थी समस्यामा परेका छन् ।