११ वर्षपछि बढ्यो भिसा शुल्क,अमेरिकी पर्यटकलाई ३० दिनको भिसा शुल्क १ सय २५ अमेरिकी डलर
प्रकाशित मिति : जेष्ठ ५, २०७६ आईतबार
सरकारले ११ वर्षपछि विदेशीका लागि भिसा शुल्क वृद्धि गरेको छ । सरकारले विदेशी पर्यटकलाई न्यूनतम १५ दिनको भिसा दिँदै आएको छ । नयाँ दस्तुरअनुसार भिसा शुल्क ३० अमेरिकी डलर पु-याइएको छ । यसअघि उनीहरूले २५ डलर तिर्दै आएका थिए । त्यस्तै ३० दिनको बहुप्रवेशी भिसाको शुल्क ४० बाट ५० तथा ९० दिनको भिसा शुल्क सयबाट एक सय २५ अमेरिकी डलर पु-याइएको छ ।
पर्यटक भिसाको म्याद थप्न विगतमा प्रतिदिन दुई डलर लाग्थ्यो । अब तीन डलर लाग्नेछ । म्याद थप अवधिका लागि बहुप्रवेशी भिसा शुल्क विगतमा २० डलर रहेकोमा २५ डलर पु-याइएको छ । भिसाको म्याद सकिएर नियमित गर्नुपर्ने अवस्थामा अब एक दिनको पाँच डलर लाग्छ । पहिले यो शुल्क तीन डलर थियो । भिसा शुल्क वृद्धि नभएको करिब ११ वर्ष भएकाले समसामयिक बनाइएको अध्यागमन विभागका प्रवक्ता रामचन्द्र तिवारीले बताए । १ साउन ०६५ देखि भिसा शुल्क बढेको थिएन । गृह मन्त्रालयको प्रस्तावमा दुई साताअघिको मन्त्रिपरिषद्को बैठकले भिसा शुल्क बढाउने निर्णय गरेको हो । यो राजपत्रमा प्रकाशित भएदेखि लागू हुनेछ ।
यसैगरी नेपालमा अध्ययनका लागि आउने विद्यार्थीको भिसा शुल्क पनि बढेको छ । डिग्री प्रोग्रामअन्तर्गत नेपाल आउने विदेशी विद्यार्थीले भिसा लिँदा तिर्नुपर्ने शुल्क पाँच डलर बढेर ३० डलर पुगेको छ । अध्यापन तथा अनुसन्धान गर्न आउने विदेशी र तिनका आश्रितले यसअघि मासिक ४० डलर तिर्नुपर्नेमा अब ५० डलर तिर्नुपर्नेछ । शिक्षक आदान–प्रदान कार्यक्रमअन्तर्गत आएका विदेशीले तिर्नुपर्ने शुल्क पनि पाँच डलर पुगेर १५ डलर तिर्नुपर्ने भएको छ ।
त्यस्तै, नेपाली मूलका विदेशी, नेपाली बाबु तथा आमाका विदेशी राहदानीबाहक सन्तानले मासिक १० डलर तिर्नुपर्नेछ । पत्रकार तथा तिनका आश्रित र नेपाली नागरिकसँग विवाह गर्ने विदेशीलाई मासिक १५ डलर शुल्क तोकिएको छ । दातृराष्ट्र र नेपाल सरकारबीच सम्झौता भई दातृराष्ट्रको प्रत्यक्ष लगानीमा सरकारी संस्थामा कार्यरत विदेशी र उनीहरूका परिवारले प्रतिमहिना ३० डलर तिर्दै आएकामा अब ५० डलर तिनुपर्ने भएको छ । बहुप्रवेशी सुविधासहितको आवासीय भिसा जारी गर्न प्रथमपटक पाँच सय डलर नवीकरण गर्दा वार्षिक दुई सय डलर तिनुपर्नेछ । विगतमा भिसा जारी गर्दा दुई सय तथा नवीकरण गर्दा एक सय डलर थियो ।
सरकारले सन् २०२० लाई पर्यटक वर्षका रूपमा मनाउने तयारी गरिरहँदा भिसा शुल्क बढाउन लागेको हो । शुल्कवृद्धिप्रति व्यवसायीले भने असन्तुष्टि व्यक्त गरेका छन् । तर, शुल्क थोरै मात्रै बढाइएकाले यसले पर्यटन व्यवसायलाई खासै असर नगर्ने अध्यागमन विभागका अधिकारीहरू बताउँछन् . यो समाचार आजको नयाँ पत्रिकामा छ ।