धेरै ओभरस्टे हुने देशका नागरिकलाई भिसा प्रतिबन्ध लगाउने अमेरिकी सरकारको तयारी - KHASOKHAS

धेरै ओभरस्टे हुने देशका नागरिकलाई भिसा प्रतिबन्ध लगाउने अमेरिकी सरकारको तयारी

अमेरिकामा विभिन्न गैरआप्रवासी भिसामा आएर भिसा सकिएपछि पनि नफर्कने अर्थात् धेरै ओभरस्टे हुने देशका नागरिकलाई अमेरिकी भिसामा प्रतिबन्ध लगाउने वा कडाई गर्ने तयारीमा ट्रम्प प्रशासन लागेको छ । अमेरिकी सरकारको डिपार्टमेन्ट अफ होमल्याण्ड सेक्युरिटीका अधिकारीलाई उद्धत गर्दै यसबारे वाल स्ट्रीट जर्नलले रिपोर्ट प्रकाशित गरेको छ ।

आर्थिक सन् २०१७ मा अमेरिकामा विभिन्न गैरआप्रवासी भिसामा आएर ओभरस्टे हुने नेपालीहरु २ दशमलव ३३ प्रतिशत रहेको छ । उक्त बर्ष ५६४ जना नेपालीहरु अमेरिकामा ओभरस्टे भएका थिए । २०१७ मा अमेरिकामा ओभरस्टे हुने नेपाली विद्यार्थीहरु (एफ, एम र जे भिसा वाहक) २२ दशमलव २२ प्रतिशत अर्थात् ७९० जना रहेका थिए । नेपाली विद्यार्थीहरु अमेरिकामा ओभरस्टे हुनेमा विश्वका २५ देशहरुभित्र पर्छन् ।

यद्यपी अमेरिकन सबैभन्दा धेरै ओभरस्टे दर अफ्रिकी देशहरुका नागरिकहरुको रहेको छ । चाड, बुर्किना फासो, लाइबेरिया, साउथ सुडान, सोमालिया जस्ता देशका नागरिकहरु अमेरिकामा आइसकेपछि फर्कने दर निकै कम रहेको छ ।

ह्वाइट हाउसका प्रवक्ता होगन गिड्लेले ओभरस्टे दर कम गर्नु प्रशासनको प्राथमिकता रहेको बताएका छन् । होमल्याण्ड सेक्युरिटीका अधिकारीका अनुशार राष्ट्रपति डोनाल्ड ट्रम्पले यसै साता भिसा ओभरस्टे हुने देशका नागरिकलाई भिसामा कडाई वा प्रतिबन्ध लगाउनेगरी यसैसाता घोषणा गर्नसक्नेछन् ।

अमेरिकी सरकारका अनुशार आर्थिक बर्ष २०१७ मा ७ लाख १ हजार ९ सय जना व्यक्ति अमेरिकामा विभिन्न गैरआप्रवासी भिसामा आएर ओभरस्टे भएका थिए । तर ट्रम्प प्रशासनले कुन कुन देशमाथि प्रतिबन्ध वा कडाई गर्न लागेको हो भन्नेबारे भने सार्वजनिक गरिएको छैन ।

सोमवार, बैशाख २, २०७६ मा प्रकाशित

Leave a Reply

Your email address will not be published. Required fields are marked *

सम्बन्धित सामाग्री

WP Facebook Auto Publish Powered By : XYZScripts.com