उत्तरपूर्वी जापानमा महा–भूकम्पको आठ बर्ष
प्रकाशित मिति : फाल्गुन २७, २०७५ सोमबार
मार्च ११ मा उत्तरपूर्वी जापानमा भूकमप गएको आठ वर्ष पुग्यो । फुकुशिमा दाइचि केन्द्र्रमा आणविक दुर्घटना निम्त्याएको सो भूकम्पलाई जापानको शक्तिशाली भूकम्पका रुपमा लिइन्छ । सन् २०११ को मार्च ११ मा उत्तरपूर्वी तोहोकु क्षेत्रमा ९ म्याग्निच्यूडको शक्तिशाली भूकम्प गएको थियो । भूकम्पछि आएको १० मिटरभन्दा उच्च सुनामीले तोहोकु र कान्तो क्षेत्रलाई प्रभावित पारेको थियो । जापानको राष्ट्रिय प्रहरी संस्थाका अनुसार सन् २०११ को विपत्तिबाट कम्तिमा पनि २२ हजार १ सय ३१ जनाको ज्यान गएको छ ।
प्रभावित क्षेत्रमा धेरै समस्याहरु अझै पनि समाधान भएका छैनन् । यहाँको क्षेत्रीय जनसङ्ख्या घट्दै गएको छ भने वृद्ध जनसङख्याहरु एक्लो जीवन बिताउन बाध्य छन् । फुकुशिमा प्रिफेक्चरका ७ महानगरपालिकामा अझै पनि निषेधित क्षेत्रहरु छन् । यस क्षेत्रका ५१ हजार ७ सय ७८ जना अझै पनि देशका विभिन्न स्थानमा विस्थापितका रुपमा रहँदै आएको फेबु्रुअरीमा पुर्निर्मिाण संस्थाले गरेको सर्वेक्षणले देखाएको छ । विस्थापितको संख्या क्रमशः घट्दै गएको भएपनि विस्थापित अवधि भने लम्बिँदै गएको छ ।
सो भूकम्पमा फुकुशिमा दाइचि केन्द्रमा ठूलो आणविक दुर्घटना भएको थियो र त्यसयता यो पूर्णतयाः बन्द छ । यस आणविक केन्द्रको सुधार र मूल्याङ्कन भइरहेको र सन् २०२१ बाट यसलाई सञ्चालनमा ल्याउने प्रयासहरु भइरहेको बताइएको छ ।
आज जापानका विभिन्न स्थानहरुमा सो भूकम्प तथा सुनामीमा मृत्युवरण गरेका आत्माहरुको चिर शान्तीको कामना गर्दै प्रार्थना सभाहरु आयोजना गरिएका थिए । मार्च ११ का दिन भुकम्प गएको समय दिउँसो २ः४५ बजेको समयमा हरेक बर्ष प्रार्थना गर्ने गरिएको छ ।