जापानमा मोबाइल फोनको शुल्क घटाउने प्रस्ताव पारित
प्रकाशित मिति : फाल्गुन २३, २०७५ बिहीबार
जापानमा मोबाइल फोनको सेवा शुल्क घटाउने प्रस्ताव पारित भएको छ । अन्य राष्ट्रको तुलनामा जापानी मोबाइल फोनको शुल्क अत्यन्तै बढी रहेको भन्दै सर्वत्र आलोचना भएपछि प्रधानमन्त्री सिञ्जो आवेको क्याबिनेटले यो प्रस्ताव स्विकृत गरेको हो । दूरसञ्चार व्यवसायसम्बन्धी कानूनको संसोधन गर्न पेश गरिएको प्रस्तावमा फोन र कनेक्शन दुवैको शुल्क समावेश हुने खालका योजना बनाउन कम्पनीहरुलाई रोक लगाउने छ ।
हाल जापानी क्यारियरहरुले उपकरण खरिदको सूहलियतको साटफेरका लागि डाटा प्रयोगमा बढी शुल्क लगाउँदै आएका छन् । अब भने उनीहरुले डाटा र उपकरणको छुट्टा छुट्टै शुल्क लिनुपर्ने भएको छ । यसले प्रयोगकर्तालाई सेवासम्बन्धी तुलनात्मक अध्ययन गर्न सजिलो बनाउँछ भने प्रतिस्पर्धा बढाएर शुल्क घटाउन पनि सहयोग गर्ने सञ्चार मन्त्री मारातोसी इशिदाले बताएका छन् । जापानका प्रमुख क्यारियरमध्ये दुई ओटा सफ्टबैङ्क कर्पोरेशन र केडीडीआई कर्पोरेशनले आफूले नयाँ नियमको पालना गर्न थालिसकेको बताएका छन् भने एनटीटी डोकोमो इङ्कले भने छिट्टै नै यसको पालना गर्न थाल्ने बताएको छ ।
जापानको ६० प्रतिशतभन्दा बढीसँग स्मार्टफोन रहेको र यसमा टयाब्लेट र अन्य उपकरण पनि समावेश गर्ने हो भने यो संख्या ८ प्रतिशतमा पुग्ने बताइएको छ । सन् २०१७ मा जापानी घरपरिवारले मोबाइल शुल्कमा औसत १ लाख २ सय ५० येन खर्च गरेको आन्तरिक मामिला तथा सञ्चार मन्त्रालयले सार्वजनिक गरेको तथ्याङ्कले देखाएको छ । विश्वका अन्य राष्ट्रको तुलनामा जापानको मोबाइल शुल्क धेरै छ । टोकियोमा मासिक २० गिगाबाइट डाटा प्रयोग गर्न ७ हजार येन लाग्छ । यो न्यूयोर्क, लण्डन र सोल लगायतका शहरको तुलनामा सबैभन्दा बढी हो ।