ललितपुर बिष्फोटमा ३ घाइते, कमलपोखरीमा बम, बागलुङ र पोखरामा एनसेल टावरमा आगजनी
प्रकाशित मिति : फाल्गुन १०, २०७५ शुक्रबार
ललितपुरको नख्खुमा शुक्रबार राति भएको बम विस्फोटमा तीन घाइते भएका छन् । एनसेलको कार्यालयको गेटमा बम विस्फोट हुँदा प्रतिक्षा खड्का, सिंहप्रसाद गुरुङ र उरुसा मानन्धर घाइते भएका छन्।
बम विस्फोट गराएपछि राजधानीको सुरक्षा व्यवस्था कडा पारिएको छ । विभिन्न नाका र सडकहरुमा चेकजाँचलाई कडा पारिएको छ । प्रहरी प्रधान कार्यालयले उपत्यकाका सबै प्रहरी इकाइहरुलाई अलर्ट रहन निर्देशन दिएको जनाइएको छ ।
यसैबीच काठमाडौँको कमलपोखरीस्थित लोहोत्से चोकमा रहेको आगन स्वीट्सभित्र बम फेला परेको छ ।पसलको टेबलमाथि खरानी कलरको ब्यागमा प्रेसर कुकर बम फेला परेको प्रहरीले जनाएको छ । घटनास्थलमा नेपाली सेनाको टोली पुगेर बम डिस्पोज गरेको छ ।
त्यस्तै बागलुङका विभिन्न ठाउँमा रहेका निजी दूरसञ्चार प्रदायक कम्पनी एनसेएलका टावरहरूमा बिहीबार राति आगजनी गरिएको छ ।
बागलुङ नगरपालिका–७ मुल्पानी, गल्कोट नगरपालिका ८ काँडेवाँस र निसीखोला गाउँपालिका ७ राजकुतमा रहेको एनसेलको टावरमा आगजनी भएको हो ।
यस्तै पोखरा महानगरपालिका २७ चन्द्रकालिका डाडाको नाकस्थित एनसेलको टावरमा आगजनी गरिएको छ। सर्वोच्च अदालतले केही दिनअघि एनसेलले सरकारलाई अर्बौं कर तिर्न बाँकी देखिएकाले कर तिराउन सरकारका नाममा आदेश जारी गरेको थियो तर सरकारले कुनै वास्ता गरको छैन।
यी घटनाहरु एकअर्कोसँग सम्बन्धित भए नभएकोबारे केही जानकारी प्राप्त भएको छैन ।