सफलता एचआइभी शिक्षा सदन विश्वकै पहिलो पहिचानसहितको विद्यालय
प्रकाशित मिति : फाल्गुन ४, २०७५ शनिबार
जन्मिदै एचआईभी संक्रमित हुनुको पीडा त छदै छ । त्यसमाथि आफन्तबाटै तिरस्कृत हुनुपर्दा एचआइभी संक्रमित बालबालिकाका आधारभूत अधिकार खोसिन्छ । अध्ययनमा समेत बञ्चित हुनु परेका घटना अनेकौं छन् । यो पृष्ठभूमिमा काठमाडौंको कीर्तिपुरस्थित ‘बेबी लाइभ होम’ बाट सञ्चालित सफलता एचआइभी शिक्षा सदन भने विश्वकै पहिलो पहिचानसहितको विद्यालय’मा सूचिकृत भएको छ । जहाँ २३ जना एचआइभी संक्रमित बालबालिका अध्यनरत छन् ।
०६७ सालमा एचआइभी संक्रमित बालबालिका बिचल्ली भन्ने न्यूज सुनेर राजकुमार पुन र उमा गुरुङ राहत लिएर दाङ पुगेका थिए । तर, गाउँलेले एचआइभी फैलाउने भन्दै लैजान भनेपछि पुन र गुरुङले यिनलाई साथै काठमाडौं ल्याए । ‘बेबी लाइभ होम’ दर्ता गरेर बाबुआमाको लागि बनाएको घर बेचेर २३ बालबालिकालाई नयाँ जीवन दिन सुरु गरे यिनले ।
एचआइभीको क्षेत्रमा काम गर्ने एनजीओ÷आइएनजीओको सहयोग लिएको छैन ‘बेबी लाइभ होम’ले । तरकारी उत्पादक राजकुमारले त्यसैको आम्दानीबाट यी बालबाबालिकालाई पालनपोषण गरिरहेका छन् । उमाले कस्मेटिक पसल बेचेर बालबालिकालाई सहयोग गरिरहेकी छन् । कुनै स्कूलले यि बालबालिका भर्ना नलिएपछि आफैंले सुरु गरेको सफलता एचआइभी शिक्षा सदन विश्वकै पहिलो पहिचानसहितको विद्यालय बनेको छ अहिले ।
वर्षको २५ लाख खर्च हुन्छ । तर, नौ बर्षमा २ लाख रुपैयाँ मात्रै दिएको छ । ‘बेबी लाइभ होम’ र सफलता शिक्ष सदन भएको भवन र जग्गासमेत राजकुमारले बालबालिकाकै नाममा गरिदिएका छन् । सरकारले सहयोग गरेर देशभर भएका एचआइभी संक्रमित बालबालिकालाई उपचार र पढाईमा सहयोग गर्नुपर्ने यिनीहरुको भनाइ छ ।
नेपालभर १५ बर्ष मुनिका १ हजार बालबालिकामा एचआइभी रहेको पुष्टी भएको छ । उपचार र पालनपोषण नपाएर संक्रमित बालबालिकाको मृत्युदर उच्च छ ।