सरस्वती पूजासँगै क्यारिवियनका विद्यार्थिले गरे आफैले बनाएको रोबोट प्रदर्शन !
प्रकाशित मिति : माघ २७, २०७५ आईतबार
प्रत्येक वर्ष माघ शुक्ल पञ्चमीका दिन मनाइने श्रीपञ्चमी विद्याकी अधिष्ठात्री देवी सरस्वतीको पूजा आराधना गरी आइतबार देशभर मनाइएको छ ।
वसन्त पञ्चमीका दिन सरस्वतीको पूजा गरे विद्या बुद्धि बढ्ने विश्वास रहेको छ । आज देशभरका सरस्वती मन्दिरमा पूजा आराधना गर्न श्रद्धालुको भीड लाग्छ । विद्यालय नपठाइएका साना बालबालिकालाई आजकै दिनदेखि अक्षरारम्भ गराउने चलन छ । आजका दिन लेखपढ गर्न सिकाए राम्रो विद्या आउने धार्मिक विश्वास छ ।
विद्या र सिर्जनाकी देवी भएकाले विशेष गरी साहित्यकार, कलाकार, पत्रकार, शिक्षक र विद्यार्थी आ–आफ्ना कला–साधनाका वस्तु कलम, कापी, कुची र वाद्ययन्त्र आदिलाई सरस्वतीका रूपमा पूजा–आराधना गर्छन् भने तान्त्रिकहरू तन्त्र सिद्धिका लागि तारादेवीका रूपमा आराधना गर्छन् ।
सूर्य उत्तरतिर लागी दिन लामो हुने र वसन्त ऋतु प्रारम्भ हुने विश्वासका साथ आजका दिनलाई ‘वसन्त पञ्चमी’ पनि भन्ने गरिन्छ । ऋग्वेदमा वाग्देवीका नामले प्रसिद्धि पाएकी ब्रह्माकी अर्धाङ्गिनी ब्रह्मायणीको पूजा उपासनाले सबै प्रकारको ज्ञान, सिद्धि र सद्बुद्धि प्राप्त हुने भएकाले सरस्वती पूजाको ठूलो महत्व छ । गान्धर्व पुराणमा आजका दिन सरस्वतीको पूजा गरी विद्यारम्भ गरेमा सर्वसिद्धि प्राप्त हुन्छ भन्ने उल्लेख छ ।
आजका दिन विवाह, व्रतबन्ध, गुफा राख्ने र बेलविवाह (इही) जस्ता सामाजिक तथा धार्मिक कार्य गर्न साइत हेर्नुपर्दैन भन्ने विश्वास छ । यस दिन बालबालिकालाई शिक्षारम्भका साथै नाक–कान छेडिदिने गरिन्छ ।
उपत्यकाका स्वयम्भू, मैतीदेवी र गैरीधारास्थित नीलसरस्वती, ललितपुरको लेलेलगायत अन्य जिल्लामा रहेका सरस्वतीका मन्दिरमा आज बिहानैदेखि पूजाआजा गर्न भक्तजन, खासगरी छात्रछात्राको घुइँचो लाग्ने गर्छ । सरस्वतीलाई चढाइएको सात गेडा अक्षता दाँतले नछोई निलेमा विद्या र बुद्धि स्फुरण भई विद्यादेवीबाट चेतनाको ज्योति पाइन्छ भन्ने धार्मिक विश्वास छ ।
यता क्यारिवियन स्कुलले भने सरस्वती पुजा स्कुलमै गर्नुको साथै विद्यार्थिहरुले बनाएका विभिन्न कलाहरुलाई प्रदर्शन गरेको थियो ।
प्रदर्शनमा सबैभन्दा आकर्षक कक्षा ८ र ९ ले बनाएको रोबोट थिए । रोबोटलाई ओजस शाक्य, बन्दना राई, विजय कुमार पण्डित,अबि केःसी,समिर सापकोटा र तोपेन्द्र सिंहले बनाएका थिए । उनीहरुले बनाएको रोबोटलाई रिमोट र मोबाइलबाट कन्ट्रोल गर्न तथा चलाउन सकिन्छ । प्रदर्शनमा राखिएको रोबोटलाई अभिभावक, शिक्षक , क्यारिवियन कलेज तथा क्यासवियन कलेजका विद्यार्थिले अवलोकन गरेका थिए । उनीहरुलाई अमेरिकामा आइटी सम्बन्धि अध्यायन गर्दै आएका यसिम राना र विवेक कुमार पण्डितले एक महिनाको तालिम समेत दिएका थिए ।