नुवाकोटमा छोरी बिक्री गरेको अभियोगमा बुबा सहित तीन पक्राउ
प्रकाशित मिति : माघ १२, २०७५ शनिबार
१५ वर्षकी एक किशोरीलाई भारतमा लगेर बिक्री गरेको अभियोगमा नुवाकोट प्रहरीले उनको बुबा सहित तीन जनालाई पक्राउ गरेको छ ।
पक्राउ पर्नेमा किशोरीका बुबा सहित दुप्चेश्वर गाउपालिका वडा नं. ६ का २२ वर्षीय सुनिल तामाङ र सोही स्थानका ३१ वर्षीया लक्ष्मी नेपाली रहेको जिल्ला प्रहरी कार्यालय नुवाकोटका प्रहरी उपरीक्षक कृष्णबहादुर पल्लिमगरले जानकारी दिए ।
प्रहरीले उनीहरुलाई नुवाकोट जिल्ला अदालतमा मानव बेचविखन तथा ओसार पसार विरुद्धको अभियोगमा मुद्धा दर्ता गरी अनुसन्धानको लागी हिरासतमा राखेर अनुसन्धान अघि बढाएको छ ।
काठमाडौको विभिन्न स्थानबाट मंगलबार उनीहरुलाई पक्राउ गरी कारबाहीको लागी नुवाकोट ल्याएर अनुसन्धान सुरु गरेको र संलग्न अन्यको पनि खोजी भइरहेको प्रहरीले जनाएको छ । बुबा सहित तीन जनाले किशोरीलाई गत पुस २२ गते नुवाकोटहुँदै भारतको बेश्यालयमा लगेर बिक्री गरेको प्रहरीको दाबी छ ।
पीडित किशोरीलाई भारतीय प्रहरीको सहयोगमा नेपाल प्रहरीले उद्धार गरेर गत साता नेपाल फर्काइएको थियो ।