रुपन्देहीमा अवैध काठ सहित विद्यालय ब्यवस्थापन अध्यक्ष सहित छ जना पक्राउ
प्रकाशित मिति : माघ १२, २०७५ शनिबार
रुपन्देही जिल्ला वन कार्यालयले अवैध काठ सहित ज्ञानोदय आधारभूत विद्यालय कन्चन गा.पा.,५ पिपरीचापा रुपन्देहीका ब्यवस्थापन समिती अध्यक्ष सहित छ जना पक्राउ गरि हिरासतमा राखेको छ ।
पक्राउ पर्नेहरुमा वि.व्य.स. अध्यक्ष चाम बहादुर थापा, सदस्य चन्द्र बहादुर परियार र छविलाल झाँक्री रहेका छन । उनीहरुलाई करिव १४५ क्यू फिट साल जातको काठ बरामद सहित पक्राउ गरिएको रुपन्देही डिभिजनल वन अधिकृत भरत बाबु श्रेष्ठले जानकारी दिएका छन् ।
अध्यक्ष थापाले उक्त काठ विद्यालय कम्पाउण्ड आसपासबाटै विद्यालको फर्निचर सामाग्री निर्माणका लागी कटान गरिएको दाबी गरेका छन् । थापाले खसोखास सँग भने, वन कार्यालयलाई जानकारी नदिइ काठकाट्नु हाम्रो कमजोरी भयो तर सो काठ हामिले विद्यालयकै प्रयोजनका लागि कटान गरेका हौं । हामीले सफाई पाउनुपर्छ ।
तर रुपन्देही डिभिजनल वन अधिकृत भरत बाबु श्रेष्ठले भने सो काठ विद्यालय प्रयोजनका लागि भए नभएको पुष्टी हुन बाँकी रहेको बताएका छन् । सो सम्बन्धमा विद्यालयका प्र.अ. रेनुका थापा लगायतसँगको बयानका लागी टोली खटाइएको उनले बताए ।
कक्षा ८ सम्म सञ्चालन भैरहेको उक्त विद्यालयमा १ जना परिचर सहित १० जना शिक्षक रहेका छन् भने विद्यालय पिपरीचापा सामुदायिक वन क्षेत्र रुद्रपुरमा पर्दछ ।
त्यस्तै बाँकी ३ जना करिब १७ क्यू फिट साल काठ सहित बुटवल रुपन्देदी रामनगर बेसक्याप नजिकै बाट पक्राउ परेका छन् ।
पक्राउ पर्नेहरुमा बुटवल ७, शिवनगर बस्ने भिम बहादुर गुरुङ, बुटवल १, तिनाउ बस्ने राम बहादुर अर्घाली मगर र पाल्पा ४ रावाबास बस्ने पदम थापा (पदम ब. ढाडा) रहेका छन् ।
उनिहरुलाइ रामनगर वडा प्रहरी कार्यालयको प्रनानि शेर बहादुर थापाको टोलिले प्रक्राउ गरी प्रहरी निरिक्षक हेम बहादुर के. सी.को नेतृत्वमा रुपन्देही वन कार्यालय लाई जिम्मा लगाइएको छ । उनीहरुलाई डिभिजनल वन कार्यालय भैरहवाको थुनुवा कोठामा राखिएको छ ।