नेपालीसहितका एसाइलम सुनुवाई सोमबारदेखि, शटडाउनका बेला सुनुवाई परेकाले के गर्ने ?
प्रकाशित मिति : ११ माघ २०७५, शुक्रबार
सरकार शटडाउन अन्त्यसँगै सोमबारदेखि अमेरिकी अध्यागमन अदालतमा मुद्दाको सुनुवाई सुचारु हुने भएको छ । सरकार शटडाउनका कारण नेपालीका झण्डै डेढसय एसाइलमका मुद्दाहरु स्थगित भएको सन्दर्भमा सोमबारदेखि भने सुनुवाई सुचारु हुने भएको छ ।
सोमबारदेखि अदालतमा अध्यागमन मुद्दाको सुनुवाई तय भएका सबै आवेदकहरु तोकिएको समयमा नै अदालतमा उपस्थीत हुनुपर्ने अमेरिकाका चर्चित नेपाली कानुन व्यवसायी रमेश श्रेष्ठले जानकारी दिनुभयो । उहाँले भन्नुभयो – ‘सरकार शटडाउन अन्त्य भएपछि सोमबारदेखि पहिले तोकिएको सबै अध्यागमन मुद्दाको सुनुवाई सुचारु हुनेछ । आवेदकहरु तोकिएकै समयमा अदालतमा उपस्थीत हुन जरुरी छ ।’
तर डिसेम्बर २२ देखि जनवरी २५ सम्म सुनुवाई स्थगित भएका एसाइलमका मुद्दाका लागि भने अदालतले नयाँ सुनुवाईको मिति तय गर्नेछ । उक्त मिति कम्तीमा पनि दुईतीनबर्ष पछाडिकोमात्र पाउन सकिने सम्भावना रहेको श्रेष्ठले खसोखासलाई जानकारी दिनुभयो ।
आफ्नो मुद्दामा वकिलले प्रतिनिधित्व गरेका आवेदकले वकिललाई सम्पर्क गर्न र वकिल नहुनेहरुले आफ्ना ठेगानामा पत्रहरु नियमित चेक गर्न श्रेष्ठले सुझाव दिनुभयो । सुनुवाईको नयाँ मिति सहित अदालतले पत्र पठाउने भएकाले अदालतमा सम्पर्क गर्न खासै आवश्यक नहुने श्रेष्ठको भनाई छ ।
सोमबार देखि अध्यागमन मुद्दाको सुनुवाई सुचारु हुने भएपनि सरकारका तर्फबाट राख्ने अनुवादकका सन्दर्भमा समस्या भएमा भने सोमबारदेखि तय कतिपय मुद्दाको सुनुवाई समेत पछि सर्न सक्ने श्रेष्ठले जानकारी दिनुभएको छ । मुद्दाका लागि तय भएका अनुवादकलाई कम्तीमा एकसाता अगाडि नै जानकारी दिने प्रचलन रहेको सन्दर्भमा सरकार शटडाउनका कारण कतिपय अनुवादकहरुले सुनुवाईका लागि सुचना पाएका छैनन् ।