नारायणगढ–मुग्लिन सडक विस्तारपछि व्यापार फस्टायो
प्रकाशित मिति : माघ २, २०७५ बुधबार
नारायणगढ–मुग्लिन सडकखण्डमा कुनै समय यात्रु र स्थानीयवासीले सबैभन्दा धेरै सास्ती खेप्नु पथ्र्यो । यो सडकको नाम लिने बित्तिकै धेरैको आङ सिरिङ्ग हुुन्थ्यो । चार वर्ष लगाएर सडक निर्माण सम्पन्न गरिएसँगै सो क्षेत्रको मुहार फेरिएको छ ।
नारायणगढ–मुग्लिन सडकखण्ड विस्तार गरिएपछि यस क्षेत्रका होटल तथा रेष्टुरेष्टको व्यापार व्यवसाय फस्टाएको छ । “चार वर्षसम्म धुलो र पहिरोको सास्ती भोग्यौँ,” भरतपुर महानगरपालिका–२९ खहरेका रेष्टुरेष्ट व्यवसायी नारायणकुमार मगरले भन्नुभयो”, व्यापारको त कुरै छाडौँ, घरमा समेत बस्न सक्ने अवस्था थिएन ।” सडक विस्तारपछि व्यापार चार गुणाले वृद्धि भएको उहाँको भनाइ छ ।
सडक विस्तारपछि उक्त सडकखण्डमा यात्रा गर्नेको सङ्ख्या बढेको छ । “धुलो र अत्यधिक जामका कारण चालक र यात्रुले गाडी रोक्न मान्दैनथे,” मगरले भन्नुभयो, “अहिले यात्रुले यही खाजा÷खाना खान्छौँ भन्ने गरेका छन् ।” घण्टौँ लाग्ने बाटो अहिले करीब ३० मिनेट छोट्टिएको छ । भरतपुर र नारायणगढ बजारका बासिन्दा समेत ढिँडो र लोकल कुखुराको स्वाद लिन आउने गरेको मगरले बताउनुभयो । “सडक विस्तार गर्नु अघि दैनिक रु पाँच हजासम्म व्यापार हुन्थ्यो, अहिले दैनिक रु ३० हजारसम्मको व्यापार हुन्छ ।” सामान्य चिया पसल गर्नेका पनि व्यापार फस्टाएको छ ।
दासढुङ्गामा होटल व्यवसाय गरिरहनुभएका भरतपुर महानगरपालिका–२९ का वडाध्यक्ष मानबहादुर मगर सडक स्तरोन्नतिका कारण सुस्ताएको व्यापारमा वृद्धि भएको बताउनुहुन्छ । “अहिले सडकको अवस्थामा निकै सुधार आएको छ, हाम्रो व्यापार पनि बढेको छ”, उहाँले भन्नुभयो । पछिल्लो समय यस क्षेत्रका अधिकांश होटल व्यवसायीले खाना गुणस्तरमा समेत ध्यान दिएको पाइएको छ ।
होटल व्यवसायी सङ्घ चितवन, रामनगर सिमलताल एकाइका अध्यक्ष रामबहादुर गुरुङ सडकको अवस्थामा सुधार आएपछि अधिकांशले सवारीसाधन रोक्ने गरेको बताउनुहुन्छ । “अहिले सबैले यही सडकखण्ड प्रयोग गर्न थालेका छन,” उहाँले भन्नुभयो । सो सडकखण्डअन्तर्गतका होटल तथा रेष्टुरेन्टलाई व्यवस्थित गर्न थालिएको छ । नारायणगढ–मुग्लिन सडकखण्ड अन्तर्गतका रामनगर, जुगेडी, दासढुङगा, खहरे, चौधकिलो, गाइघाट, घुमाउने, सिमलताल, जलविरेलगायत क्षेत्रको व्यापार व्यवसाय अहिले फस्टाएको छ । सो सडकखण्डमा व्यवसायी सङ्घमा आवद्ध ५४ तथा अन्य साना ठूला गरी करीब दुई सय होटल र रेष्टुरेन्ट छन् ।