आफूलाई कालोमोसो दल्ने युवालाई छोडिदिन लोकमानको आग्रह
प्रकाशित मिति : पुस ९, २०७३ शनिबार
अख्तियार दुरुपयोग अनुसन्धान आयोगका निलम्बित प्रमुख लोकमान सिंह कार्कीले आफूलाई अदालतभित्र कालोमोसो दल्ने युवालाई छोडिदिन आग्रह गरेका छन् ।
तर, कार्कीले भने उनीहरु कसैको गोटी मात्र भएको र आफूलाई तोजोबध गराउने योजना कार्यान्वयनको कारिन्दा मात्र भएको बताएका छन् ।
पक्राउ परेकालाई ‘अवोध कारिन्दा’ भन्दै कार्कीले भनेका छन्, ‘वास्तविक अपराधी पर्दा पछाडि भएको र केही महिनायता मेराविरुद्ध विभिन्न प्रकारले षड्यन्त्रमुलक योजना बनाउनेहरु कानुन र प्रहरीको नियन्त्रणमा आउने स्थिति तत्काल नदेखिएको हुँदा ती अवोध कारिन्दालाई कुनै कारबाही नगरी रिहा गरिदिन म सुरक्षा निकायलाई अनुरोध गर्छु ।’
प्रमुख लोकमान सिंह कार्कीमाथि आक्रमण गर्दै कालो मोसो दल्ने दुई युवालाई सात दिन थुनामा राख्न जिल्ला प्रशासन कार्यालय काठमाडौंले अनुमति दिएको छ । ति दुुई युवा विप्लव माओवादीको विद्यार्थी संगठनका कार्यकर्ता रहेको बताइएको छ ।
पक्राउ परेका युवालाई महानगरीय प्रहरी काठमाडौंले सार्वजनिक अपराध ऐन अन्तरगत मुद्दा चलाउने तयारी गरेको छ । प्रशासनले ७ दिन म्याद थुनामा राख्न अनुमति दिएको छ ।
पक्राउ परेका प्रकाश शाही र चन्द्रबहादुर बुढाले सर्बोच्च अदालतभित्रै लोकमानलाई आक्रमण गर्दै विहीबार कालोमोसो दलिदिएका थिए । उनीहरुको हर्कत लगत्तै प्रहरीले उनीहरुलाई पक्राउ गरेको थियो ।