२ वर्षभित्र जापानमा ६९ विदेशी प्राविधिक प्रशिक्षार्थी कामदारहरुको मृत्यु
प्रकाशित मिति : मंसिर २२, २०७५ शनिबार
सन् २०१५ देखि सन् २०१७ को बीचमा जापानमा ६९ जना विदेशी प्राविधिक प्रशिक्षार्थी कामहरहरुको मृत्यु भएको तथ्य सार्वजनिक भएको छ । सार्वजनिक प्रतिवेदनमा ट्राफिकका कारण भएको दुर्घटना, बीरामी, आत्महत्या वा अन्य कारणले जापानमा आएका प्राविधिक प्रशिक्षार्थी कामदारहरुको मृत्यु भएको बताइएको छ ।
बढीभन्दा बढी विदेशी कामदार जापान भित्राउने विवादास्पद विधयेक पास हुने तयारीमा रहेका बेला जापानको कन्सटिट्युशल डेमोक्रयाटिक पार्टीले यो दस्तावेज सार्वजनिक गरेको हो । दस्तावेजमा मृत्यु भएको मिति, राष्ट्रियता, उमेर, लिङ्ग र पेशा पनि उल्लेख गरिएको छ ।
यसबारेमा सरकारले छानबीन र अनुसन्धान अघि बढाउनु पर्ने र यसको परिणाम जनतामाझ सार्वजनिक गरिनुपर्ने यस मामिलासँग सम्बन्धित र गैर नाफामूलक संस्था सोलिडारिटि नेटवर्कले बताएको छ ।
यस दस्तावेज सार्वजनिक भएपछि जापानी प्रधानमन्त्री सिञ्जो आवेले यस बारे आफूले पहिलो पटक सुनेको र यसलाई के भन्ने भन्ने आफूलाई थाहा नभएको बताएका छन् । त्यस्तै न्याय मन्त्रालयले यसबारे थप अनुसन्धान गर्ने आफूले विश्वास लिएकोे उनले अगाडि बताए ।
गोपनियताका कारण व्यक्तिगत मामिलाबारे सूचना सार्वजनिक गर्ने न्याय मन्त्रालयको कुनै योजना नभएको न्याय मन्त्री ताकासी यामाशिताले जानकारी दिए । जापानले चरम श्रमिक अभावका कारण बढी भन्दा बढी विदेशी कामदार भित्रयाउन आवश्यक कदमहरु चालिरहेको छ ।
सरकारी तथ्यांकअनुसार गतबर्ष अक्टोबरसम्ममा जापानमा २ लाख ५८ हजार प्राविधिक प्रशिक्षार्थी कामदारहरु कार्यरत थिए जुन जापानमा काम गरिरहेका विदेशी नागरिकहरुमध्येको २० प्रतिशत संख्या हो ।