आफूमाथि अन्याय भएको पूर्व डिआईजी पार्वती थापाको गुनासो


प्रकाशित मिति : पुस ३, २०७३ आईतबार

सर्वोच्च अदालतले अरुले हालेको त्यस्तै प्रकृतिको मुद्दा एकमहिनामा फैसला गरेको तर आफ्नो मुद्दा भने ३८ महिनादेखि फैसला नगरेको पूर्व डिआईजी पार्वती थापाले गुनासो गरेकी छिन् ।

नेपाल प्रहरीमा तीस बर्ष सेवा गरेर प्रथम श्रेणी अधिकृतसम्म ठूलो संघर्ष गरेर पुगे तापनि नेपालको इतिहासमा पहिलो महिला आईजीपी हुने अवसरबाट आफूलाई बन्चित गराइएको भन्दै थापाले फेसबुकमार्फत आक्रोश पोखेकी छिन् ।

तात्कालीन नेपाल सरकारले सातवटा खाली एआईजीको पद हुँदा हुंदै पनि बढुवा नदिई जवर्जस्ती अवकाश दिएकोले आफूले २०७० साल कार्तिक २१ गते सम्मानित सर्वाेच्च अदालतमा नेपाल सरकार र सम्वन्धित निकायको विरूद्दमा रिट हालेको अहिले ३८ महिना लागेको उनको भनाई छ ।

नेपाल प्रहरीका चारजना डिआईजीहरू यादव अधिकारी, परशुराम खत्री, विश्वराज सिंह शाही र शुसीलवर सिं थापाले २०७१ सालमा आफूभन्दा जुनियरलाई बढुवा दियो भनेर मुद्दा हालेकोमा त्यो मुद्दाको सुनुवाई एक महिनाभित्र नै भएपनि आफ्नो मुद्दाको सुनुवाई भने ३८ महिनादेखि नभएको पार्वती थापाको भनाई छ ।

सम्मानित सर्वाेच्च अदालतले सिट नभए तापनि सिट थपेर एआईजीमा बढुवा दिनु भनेर परमादेश जारी गरेकोमा उहांहरूले फैसला कार्यन्वयन गरी पाऊं भनी रिट हालेकोमा त्यस्को फैसला पनि करिव २ महिना भित्रै भएर फैसला कार्यान्वयनको आदेश पाएपनि त्यस्तै प्रकृतिको आफ्नो मुद्दाको फैसला नभएको थापाको गुनासो छ ।

पार्वती थापा भन्छिन् – ‘एआईजीमा बढुवा हुने उहाँहरूलाई न्याय भयो ,म उहाँहरूलाई बधाई दिन चाहन्छु । तर मलाई सोही प्रकृतीको मुद्दामा फैसलाको लागि २०७० साल कार्तिकदेखि बर्षाै कुर्नु परेको छ । पचास प्रतिशत भन्दा बढि महिला जनसंख्या भएको यो देश नेपालमा एक्कासौं शताव्दी सम्म पनि नीति निर्माण तह र निर्णायक तहबाट महिलाको न्यायमा पहुंचप्रति दृश्टि अझै पुग्न नसकेको कुराको महशूस म जस्ता थुप्रै महिलाहरूले गरिरहेको हुनुपर्दछ ।’

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com