डिभी परेर अमेरिका आएका युवा तीन महिनादेखि न्युयोर्कको अस्पतालमा, सहयोगको अपिल
प्रकाशित मिति : मंसिर १७, २०७५ सोमबार
डिभी परेर अमेरिका आएर तीन महिनादेखि न्युयोर्कको एल्महस्र्ट अस्पतालमा उपचार गराइरहेका २३ बर्षीय सुरेश चन्दको उपचारमा सहयोगका लागि अपिल गरिएको छ । वैतडी जिल्ला दशरथ नगरपालिका गुरुखोला स्थायी घर भई कन्चनपुर भिमदत्त नगरपालिका १९ बागफाटा वसोवास गर्दै आएका जय बहादुर चन्दका छोरा सुरेश डिभी लोटरी परेर तीनमहिना अगाडि अमेरिका आएका थिए ।
सन् २०१८ का डिभी लोटरी विजेता सुरेश २०७५ साल जेठ ११ गते नेपालमा गाडी दुर्घटनामा परी सख्त घाइते भएका थिए । अमेरिकी सरकारको नियमानुसार डिभी लोटरी परेको व्यक्ति तोकिएको समयभित्र अमेरिका प्रवेश गरिसक्नु पर्नेभएकाले उनी घाइते अवस्थामा नै अमेरिका आएका थिए । नेपालमा उपचार जारी राखेका उनी भिसा सकिनुभन्दा २ दिन अगाडिमात्र अमेरिका आएका थिए ।
हाल सुरेशको शाररिक तथा आर्थिक अवस्था जटिल रहेको र काम गर्ने अवस्था नभएकाले गासबासको समेत समस्या भइरहेकाले उनलाई सहयोग गरिदिन नेपाली जनसम्पर्क समितिका सभापति तथा नेपाली काँग्रेसका आमन्त्रित केन्द्रीय सदस्य आनन्द बिष्टले अपिल गरेका छन् ।
साथै सुदुरपश्चिम समाजले पनि सहयोगका लागि अपिल र पहल गरेको छ । उनलाई सहयोग गर्नका लागि अमेरिकाको TD bank checking A/C 4345341070 मा पैसा जम्मा गरिदिन सकिनेछ । वा उनको मोबाइल नम्बर 9294628428 मा सम्पर्क गरेर पनि सहयोग गर्न सकिनेछ ।