अमेरिका घुस्न खोज्ने कागजपत्रविहिनलाई फेरी अमेरिकी जमिन छुन नपाउने गरी देशनिकाला गरिने
प्रकाशित मिति : मंसिर १०, २०७५ सोमबार
आइतबार क्यालिफोर्नियाको सान डिएगो स्थीत सान यिसिद्रो पोर्ट अफ इन्ट्रीमा तनाव उत्पन्न भएपछि जबर्जस्ती अमेरिका छिर्न खोज्ने दर्जनौं कागजपत्रविहिनहरुलाई मेक्सिकोबाट देशनिकाला गरिने भएको छ । जबर्जस्ती घुस्न खोज्ने ३९ जनालाई मेक्सिकन सुरक्षाकर्मीहरुले नियन्त्रणमा लिएका थिए । यसरी जर्बजस्ती घुस्न खोजेका दर्जनौंलाई फेरी कहिलेपनि अमेरिकी जमिन छुन नपाउने गरी मेक्सिकोबाट देशनिकाला गरिने मेक्सिकन अधिकारीहरुले जानकारी दिएका छन् ।
कागजपत्रविहिनहरुलाई अमेरिका छिर्नमा नरोके मेक्सिकोसँगको सिमानाका स्थायीरुपमा नै बन्द गर्न सकिने अमेरिकी राष्ट्रपति ट्रम्पले चेतावनी दिदै आएका छन् । आइतबार मेक्सिकोतिरबाट हुलका हुल कागजपत्रविहिन आप्रवासीहरु अमेरिका छिर्न खोजेपछि क्यालिफोर्नियाको सान डिएगो सिमानाका घण्टौं बन्द गरिएको थियो । मेक्सिकोतिरबाट झण्डै ५ सय आप्रवासीहरु अमेरिका छिर्ने प्रयास गरेका थिए ।
आइतबार दिउसो बन्द गरिएको सान यिसिद्रो पोर्ट अफ इन्ट्री सोमबार विहानदेखि पुन संचालनमा आएको छ । आप्रवासीहरु अमेरिका छिर्न प्रयास गरेपनि अमेरिकातिरबाट सुरक्षाकर्मीहरुले टियर ग्यास प्रहार गरेका थिए । टियर ग्यास प्रहारपछि आप्रवासी परिवार र केटाकेटीहरुबीच भागदौड मच्चिएको थियो ।
अमेरिका छिर्न खोज्ने आप्रवासीहरुले अमेरिकी अधिकारीहरुलाई लक्ष्यित गरेर विभिन्न बस्तुहरुले प्रहार गरेको जनाइएको छ ।
