इलेक्ट्रोनिक इञ्जिनियरलाई अष्ट्रेलियाको पीआर भिसा
प्रकाशित मिति : कार्तिक २६, २०७५ सोमबार
मेरो श्रीमान इलेक्ट्रोनिक इञ्जिनियर हुनुहुन्छ । उहाँ अहिले इञ्जिनियरिङ कलेजमा पढाउँनु पनि हुन्छ । उहाँले आइएलटीएसमा समेत राम्रो स्कोर ल्याउँनुभएको छ । के हामीले अष्ट्रेलियाको पीआर भिसा पाउन सक्छौं ?
हिमालयन कङ्गारुले करियर डेस्क शुरु गरेपछि आएका असंख्या प्रश्नहरु मध्ये यो प्रश्न हो कृतिका पौडेल उप्रेतीजीको । उहाँको जस्तै अष्ट्रेलियामा इलेक्ट्रोनिक इञ्जिनियरको स्कोप र पीआरको अवस्थाका बारेमा अरु पनि हामीलाई जिज्ञासा राख्नुभएको छ । त्यसैले यसपटक हामी इलेक्ट्रोनिक इञ्जिनियरकै विषयमा केही तथ्य जानकारीहरु प्रस्तुत गर्दैछौं ।
को हुन् इलेक्ट्रोनिक इञ्जिनियर ?
अष्ट्रेलियाको अद्यागमन नीतिको परिभाषा अनुसार कुनै पनि विद्युतीय सामाग्री वा प्रविधि,सर्किट र कम्प्युटर प्रणाली,सञ्चार माध्यम,मनोरञ्जन ,यातायात लगायत विभिन्न औद्योगिक प्रविधिहरुको डिजाइन,एडाप्ट,इन्टल,टेष्ट र मर्मत गर्ने दक्षता भएका व्यक्तिहरु इलेक्ट्रोनिक इञ्जिनियर हुन् ।
अष्ट्रेलिया एक विकसित र औद्योगिक रुपमा निकै फड्को मार्दै गएको मुलुक हो । त्यसैले यहाँ इलेक्ट्रोनिक इञ्जिनियरहरुको निश्चय नै खाँचो छ । तर पछिल्लो केही वर्ष यता अष्ट्रेलियामा इन्टरनेशनल इलेक्ट्रोनिक इञ्जिनियरहरु धेरै भित्रिएका छन् । जसले गर्दा यहाँको सरकारले छुट्याएको निश्चित कोटा वा आरक्षण संख्या लगभग समाप्त हुन लागेको छ । अष्ट्रेलियामा एउटा इलेक्ट्रोनिक इञ्जिनियरको वार्षिक आम्दानी १ लाख ११ हजार डलरभन्दा बढी छ । त्यसैले पनि अष्ट्रेलियामा आएर बस्न र काम गर्न चाहने इन्टरनेशनल इलेक्ट्रोनिक इञ्जिनियरहरु धेरै छन् ।
त्यसैले छिट्टै नै अष्ट्रेलियन सरकारले इलेक्ट्रोनिक इञ्जिनियरिङलाई दक्ष पेशाको सूचीबाट हटाउने योजना बनाइरहेको छ । यस कार्यको शुरुवात केही राज्यहरुले गरिसकेको छ । तर अझै केही राज्यहरुले भने इलेक्ट्रोनिक इञ्जिनियरलाई दक्ष कामदारको सूचीमा यथावत राखेर आवश्यक योग्यता पुगेकाहरुलाई पीआर भिसा उपलब्ध गराइरहेको छ । सीमित कोटा हुने भएकोले यसका लागि स्पोन्सरसीपको प्रवृत्तिमा निर्भर रहन्छ । त्यसो अष्ट्रेलियन सरकारले सीधै इलेक्ट्रोनिक्स इञ्जिनियरिङ शीर्षकमा पीआर भिसामा कटौति गर्दै गएपनि यसलाई सपोर्ट गर्ने अन्य केही भिसाको व्यवस्था गरेको छ । यसबारेमा यहाँले माइग्रेशन कानूनका विज्ञहरुसँग परामर्श लिनु अझ फलदायी हुन्छ । यहाँहरुले यहाँ क्लिक गरेर माइग्रेशन विज्ञहरुसँग आफ्नो कुरा राख्नसक्नुहुनेछ ।
आवश्यक योग्यताहरु :
अष्ट्रेलियाको फरक फरक राज्यहरुले इलेक्ट्रोनिक्स इञ्जिनियरिङका लागि पनि फरक फरक योग्यताको मापदण्डहरुको व्यवस्था गरेका छन् ।
तर साधारणतय निम्न योग्यताहरु आवश्यक पर्दछन् :
–इञ्जिनियरिङ विषयमा स्नातक वा सोभन्दा माथि ।
–कम्तीमा तीन वर्षको काम गरेको अनुभव
–१८ वर्ष पूरा भई ४९ ननाघेको ।
–बलियो आर्थिक सपोर्ट ।
–आइएलटिएसमा न्यूनतम् ६.५ स्कोर ।
आवश्यक योग्यता पुगेकाहरुले आवेदन दिएको मितिबाट ६–७ हप्ताको समय प्रोसेसिङका लागि समय लाग्छ ।
–हिमालयन कङ्गारु