१७ लाखको रिचार्ज कार्ड चोर्ने पक्राउ
प्रकाशित मिति : कार्तिक १५, २०७५ बिहीबार
नेपाल टेलिकमको सत्र लाख बराबरको रिचार्ज कार्ड चोरी गरेको आरोपमा दाङ प्रहरीले एकजनालाई पक्राउ गरेको छ । घोराहीबाट गत असोज २३ गते नारायणघाट लैजाँदै गरेको सत्र लाख रुपैयाँ बराबरको रिचार्ज कार्ड चोरी गरेको आरोपमा माडि गाउँपालिका– १ का २१ वर्षीय दलबहादुर पुनलाई पक्राउ गरेको दाङ प्रहरी प्रमुख कृष्णहरि शर्माले जानकारी दिनुभयो ।
ना ६ ख ९३४५ नम्बरको बसबाट चोरी भएको २१ दिन पछि रोल्पाको थवाङमा बिक्री गरिरहेको अवस्थामा डिएसपी रामप्रसाद घर्तीको कमान्डमा गएको प्रहरीले पुनलाई पक्राउ गरेको हो ।
१६ लाख १० हजार रुपैयाँ बराबरको रिचार्ज कार्ड पुनको प्युठान स्थित ससुराली घरबाट प्रहरीले बरामद गरेको छ । पुनले ९० हजारको कार्ड बिक्री वितरण गरिसकेको प्रहरीले जनाएको छ । पुनलाई जिल्ला प्रहरी कार्यालय दाङले चोरी मुद्दा चलाएको छ ।