आफैलाई कालो झण्डा देखाउने र जुत्ता हान्नेलाई जोगाए बाबुरामले
प्रकाशित मिति : मंसिर २३, २०७३ बिहीबार
नयाँ शक्ति नेपालका संयोजक डा बाबुराम भट्टराईले आफूतिर जुत्ता प्रहार गर्ने र कालो झण्डा देखाउने युवालाई नै हुलमुलबाट जोगाएका छन् । डा भट्टराईलाई कालोझण्डा देखाएपछि नयाँ शक्तिसम्बद्ध विद्यार्थीहरुले ती युवकलाई हातपात गर्न खोज्दा भट्टराईले संयमतापूर्वक परिस्थितिलाई सम्हालेका थिए ।
बिहीबार पृथ्वीनारायण क्याम्पस पोखरामा मा नयाँ शक्ति विद्यार्थी युनियनले नवआगन्तुक विद्यार्थीलाई स्वागत गर्न आयोजना गरेको कार्यक्रमलाई सम्बोधन गर्ने क्रममा एक युवकले डा भट्टराईलाई कालो झण्डा देखाएका थिए ।
सञ्जिव भट्टराई नाम गरेका ती युवाले कालो झण्डामात्र देखाएनन्, आफैँले लगाएको जुत्ता फुकालेर मञ्चतिर फाले पनि । यद्यपी उनले फालेको जुत्ता मञ्चमा सम्बोधन गरिरहेका डा। भट्टराईको आसपासमा पनि पुगेन ।
जुत्ता प्रहार गर्ने युवकले शीर्ष नेताहरुले देश बिगारेकाले भट्टराई पनि शीर्ष नेतामध्ये एक भएकाले जुत्ता प्रहार गरेको बयान प्रहरीमा दिएका छन् । प्रधानमन्त्री पुष्पकमल दाहाल प्रचण्ड, काँग्रेस सभापति शेरबहादुर देउवा र एमाले अध्यक्ष केपी ओलीलाई पनि भेट्दा जुत्ता हान्ने सोच बनाएको उनले बताएका छन् ।
के भने भट्टराईले ? (भिडियो समेत)
‘भट्टराईले सम्बोधन गरिरहँदा एक्कासी होहल्ला सुरु भयो ।
त्यसपछि भट्टराईले मञ्चबाटै भने – ‘ छोड्दिनुस्, छोड्दिनुस् केही हुँदैन ।……ए भाइ देखाउनुस्, देखाउनुस् ।…..ए भाइ त्यसो नगर हेर्न देऊ–देऊ ।……ए भाइ मैले देखेँ तपाईंको । देखाउन दिनुस्, केही फरक परेन ।…..हामी सबैले कालै लुगा लगाएका छौँ, मैले पनि लगाको छु, त्यो एउटा कालो टुक्रोले केही फरक पर्दैन ।……गर्न दिनुस्, ए भाइ नलखेट्नुस् । ठीक छ पख्नुस्, पखनुस् हामी सबै कालै छौँ ।…….. उहाँले सानो कालो झण्डा देखाइराख्नुभाछ, मैले देखिसकेँ ठीक छ । हुन दिनुस् उहाँलाई ।……….त्यसैले साथीहरु म के आग्रह गर्न चाहन्छु भने यो पनि एउटा स्वरुप हो । शान्तिपूर्ण ढंगले विरोध अभिव्यक्त गर्न पाउँछ । आफ्नो विचार व्यक्त गर्ने कुराको हामी सम्मान गर्छौँ । म उहाँलाई सम्मान गर्छु, तपाईंले अन्यथा नलिनुस् ।’
सम्बोधनका क्रममा भट्टराईले देशलाई समृद्ध बनाउन विद्यार्थीको भूमिका महत्वपूर्ण हुने बताए ।
कार्यक्रमलाई संयोजक डा भट्टराईसहित संगठन विभागप्रमुख देवेन्द्र पौडेल, प्रदेश नं। ४ संयोजक वलावति शर्मा, नेतृ करिश्मा मानन्धर लगायतले सम्बोधन गरेका थिए ।
साझा पोष्टबाट