संवैधानिक परिषद्द्वारा सर्बोच्च अदालतको प्रधानन्यायाधीशमा ओमप्रकाश मिश्र सिफारिस
प्रकाशित मिति : भाद्र ७, २०७५ बिहीबार
संवैधानिक परिषद्ले सर्बोच्च अदालतको प्रधानन्यायाधीशमा ओमप्रकाश मिश्रलाई सिफारिस गरेको छ । बिहीबार सिंहदरबारमा बसेको परिषद्को बैठकले मिश्रको नाम सर्वसम्मतरुपमा सिफारिस गरेको कानूनमन्त्री भानुभक्त ढकालले जानकारी दिनुभएको छ ।
दीपकराज जोशीलाई संसदीय सुनुवाई समितिले अयोग्य ठहर गरेपछि वरिष्ठताका आधारमा मिश्रलाई सिफारिस गरिएको हो । संसदीय समितिले पहिलो पटक परिषदको सिफारिस अस्वीकार गरेपछि मिश्रको बाटो खुलेको हो । तर उनको पनि शैक्षिक योग्यताको प्रमाण पत्रमा विवाद देखिएको छ ।
भारतीय बोर्डबाट प्रवीणता प्रमाणपत्र तह पास गरेका मिश्रले त्रिभुवन विश्वविद्यालयबाट बिएल र दिल्ली विश्वविद्यालयबाट सन् १९८९ मा मास्टर इन कम्प्यारेटिभ लको प्रमाणपत्र प्राप्त गरेको देखिएको छ ।
उनले बिएल भर्ना हुने बेला पेश गरेको माइग्रेसन सर्टि्फिकेट न्याय परिषद सचिवालयमा नभेटिएको बताईन्छ । मिश्रले नेपाल ल क्याम्पसमा सन् १९८० मा डिप्लोमा इन ल (बीएल) पढ्ने बेला त्रिभुवन विश्वविद्यालयमा पेश गरेको कागजातबारे प्रश्न उठेपछि परिषद सदस्यहरुले माइग्रेसन प्रमाणपत्र पनि मगाएर छानबिन गरेको थियो ।
मिश्रले दीपकराज जोशीसँगै रहेर गरेको हाँडीगाउँको सरकारी जग्गा व्यक्तिको नाममा गर्ने फैसला र एनसेलले कर तिर्न नपर्ने फैसला विवादमा परेका थिए । अब मिश्रले संसदीय सुनुवाई समितिको सामना गुर्नपर्नेछ ।