Follow @khasokhasmag

बेलायतमै कुटिए बेलायतका तर्फबाट फोकल्याण्ड लडेका नेपाली भेट्रान


प्रकाशित मिति : मंसिर ४, २०७३ शनिबार

बेलायतका तर्फबाट फोकल्याण्डको युद्ध लडेका एकजना ६० बर्षका गोर्खा भेट्रान बेलायतको नटिंघम नजिक कुटिएका छन् । तीनजनाको समुहबाट कुटिएका लोकेन्द्र लिम्बुको उपचार भइरहेको छ । उनले १५ बर्षसम्म बेलायती सेनाको गोरखा रेजिमेन्टमा काम गरेका थिए ।

बेलायतको सेवा गरेका ६० बर्षका आफ्ना पिता बिनाकारण बेलायती भूमीमा नै कुटिनु परेकोमा उनकी छोरीले दुख व्यक्त गरेकी छिन् ।

लोकेन्द्रले जगिङ गरिरहेको बखत तीनजना व्यक्ति अचानक उनी नजिक आएको र तीमध्ये एकजनाले सावेल बोकिरहेको लोकेन्द्रले जनाएका छन् । आफूले डरले सावेलतिर हेरिरहेको बखत अर्को एकजनाले कुटपिट गरेको उनको भनाई छ ।

उनले भने – ‘त्यो व्यक्ति आएर मतिर सावेल उठायो । म डराएर सावेलतिर हेरिरहेको थिएँ । यत्तिकैमा अर्काे आएर मलाई मुख र अनुहारतिर हिर्कायो ।’

कुटपिटपछि उनी केहीबेर अचेत भएका थिए । उनलाई त्यसपछि छोरीले अस्पताल लगेकी थिइन् ।

लोकेन्द्रकी छोरी तेजा लिम्बुले भनिन् – ‘उहाँ बेलायती सेनाका भेट्रान हुनुहुन्छ । उहाँले देशको लागि सेवा गर्नुभयो । सधै नियम कानुन मानेर बस्नुभयो । देशको सुरक्षा र सेवा गरेको व्यक्तिलाई ६० बर्षको उमेरमा यही देशमा कुटिनुपर्ला भनेर मैले कहिले सोंचिन ।’

घटनाका बारेमा नटिघमसायर प्रहरीले अनुसन्धान गरिरहेको जनाइएको छ ।

बेलायतमा ब्र्रक्जिटपछि आप्रवासीहरुबिरुद्ध विभेद र घृणाका अपराधमा बृद्धि भएको छ । नेपाली मूलका आप्रवासीहरुले पनि विभेद र घृणाका अपराधका घटनाहरु भोग्नुपरेपनि कुटपिटकै अवस्था भने आएको थिएन । अमेरिकामा डोनाल्ट ट्रम्प राष्ट्रपतिमा विजय भएलगत्तै एसियन, अफ्रिकी र मुस्लिम आप्रवासीहरुले घृणा र विभेदका घटनाको सामना गर्नुपरेजस्तै ब्रेक्जिट पछि बेलायतमा पनि यो क्रम बढेको हो ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com