जोशी बिदामा बसेपछि वरिष्ठ न्यायाधीश ओमप्रकाश मिश्रले सम्हाले जिम्मेवारी
प्रकाशित मिति : श्रावण २०, २०७५ आईतबार
सर्वोच्च अदालतको वरिष्ठ न्यायाधीशको हैसियतले कायम मुकाय प्रधानन्यायाधीश ओमप्रकाश मिश्रले आजदेखि काम शुरु गरेका छन् ।
संसदीय सुनुवाइ विशेष समितिले प्रधानन्यायाधीशमा प्रस्तावित कामु प्रधानन्यायाधीश दीपकराज जोशीको नाम अस्वीकृत गरेपछि जोशी आजैबाट बिदामा बसेका छन् ।
जोशी बिदामा बसेपछि वरिष्ठ न्यायाधीश मिश्रले कामु प्रधानन्यायाधीशको हैसियतमा आज मुद्दाको पेशी तोकेर काम शुरु गरेको सर्वोच्च अदालतका सहप्रवक्ता नागेन्द्र कालाखेतीले जानकारी दिए ।
जोशीलाई समितिले न्याय सम्पादनका क्रममा अदालतमा बसेर स्वतन्त्र, सक्षम र विकृतिहीन न्यायपालिका बनाउन उचित भूमिका निर्वाह गर्न नसकेको आरोप लगाएपछि उनी बिदामा बसेका हुन् ।
संसदीय सुनुवाई विशेष समितिले कामु प्रधानन्यायाधीश जोशीलाई प्रधानन्यायाधीश बन्न अयोग्य ठहर गरेकामा संविधान र कानूनविद पनि विभाजित भएका छन् ।
स्वयं कानून व्यवसायीहरुको छाता संगठन नेपाल बार एशोसिएशनले समितिले न्यायालयमाथि ठाडो हस्तक्षेप भएको र यसले न्यायालयमा संवैधानिक संकट उत्पन्न हुन सक्ने जनाएको छ ।
सत्तारुढ नेकपानिकट देखिएका वकिलहरुले भने जोशी अब काममा फर्कन नमिल्ने तर्क गरिरहेका छन् ।
नेकपाका नेताहरुले जोशी काममा फर्किएमा महाभियोगसम्म लाग्न सक्ने चेतावनीयुक्त भाषा पनि प्रयोग गरिरहेका छन् । जोशीको बहिर्गमनपछि भने वरिष्ठताका आधारमा न्यायाधीशद्वय ओमप्रकाश मिश्र र चोलेन्द्रशम्शेर जवरामध्ये एकलाई संवैधानिक परिषद्ले सिफारिश गर्न सक्ने कानूनी व्यवस्था छ ।
यसअघि न्यायपरिषदले जोशी, मिश्र र राणाको नाम संवैधानिक परिषदमा सिफारिश गरेको थियो ।