आप्रवासी भिसामा अमेरिका छिरेको १२० दिनमा ग्रिनकार्ड
प्रकाशित मिति : श्रावण १८, २०७५ शुक्रबार
अमेरिकामा आउनासाथ ग्रिनकार्ड प्राप्त गर्ने दर्जनौं प्रकारका आप्रवासी भिसाहरु रहेका छन् । जसमध्ये नेपालीहरुका सन्दर्भमा रोजगारमा आधारित, परिवारमा आधारित र डिभी लोटरीमा आधारित भिसा सबैभन्दा चर्चित हो ।
परिवारमा आधारित आप्रवासी भिसाहरुमा अमेरिकी नागरिकका दम्पत्ति, मंगेतर, बच्चाबच्ची र निश्चित नातेदार, अमेरिकी ग्रिनकार्ड होल्डरका दम्पत्ति र छोराछोरी, रोजगारमा आधारित आप्रवासी भिसाहरुमा प्राथमिकतामा परेका एक्स्ट्रा अर्डिनरी कामदार, अतिरिक्त क्षमता भएका र एड्भान्स डिग्री भएका पेशाकर्मीहरुलाई दिइने भिसाहरु रहेका छन् । त्यो बाहेक डिभी लोटरीमार्फत अमेरिका आउनेको संख्या पनि ठूलो छ ।
आप्रवासी भिसामा अमेरिका आउनेहरुको अन्तरवार्ता सम्बन्धित देशमा नै दूतावासले लिने भएकाले उनीहरुले अमेरिका आउनासाथ ग्रिनकार्ड प्राप्त गर्छन् । यदि तपाई आप्रवासी भिसामा अमेरिका आउनुभएको छ र तपाईले आप्रवासी भिसा शुल्क तिरिसक्नुभएको छ भने तपाई अमेरिका आएको १२० दिनभित्र तपाईले ग्रिनकार्ड प्राप्त गर्नुहुनेछ ।
यदि तपाई आप्रवासी भिसामा अमेरिका आउनुभएको छ र तपाईले आप्रवासी भिसा शुल्क तिर्नुभएको छैन भने तुरुन्त तिर्नुहोला । शुल्क तिरेको १२० दिनभित्र तपाईले ग्रिनकार्ड प्राप्त गर्नुहुनेछ । यदि तपाईले आप्रवासी भिसा शुल्क तिर्नुभएन भने ग्रिनकार्ड पाउनुहुनेछैन । अध्यागमनले लगाएको स्ट्याम्प १ बर्षको लागिमात्र अद्यावधिक हुने भएकाले त्यसपछि तपाई अमेरिकामा स्थायी बासिन्दा भएको प्रमाणका रुपमा ग्रिनकार्ड पेश गर्नुपर्नेछ ।
आप्रवासी भिसा शुल्क यो लिंकमार्फत तिर्न सक्नुहुन्छ । तपाईले आफ्नो ए नम्बर र डिपार्टमेन्ट अफ स्टेटको केस आईडीहालेर शुल्क तिर्न सक्नुहुन्छ ।
