घाइतेको मृत्युपछि तुलसीपुर सिटी अस्पतालमा तनाव


प्रकाशित मिति : श्रावण ८, २०७५ मंगलबार

ट्याक्टरले मोटरसाइकललाई ठक्कर दिँदा गम्भीर घाइते भएका केबल बस्नेतको मृत्यु भएपछि उनका आफन्त आक्रोशित बनेका छन्। ट्याक्टरको ठक्करबाट घाइते भएका बस्नेतको तुलसीपुरस्थित एक निजी अस्पतालमा उपचारका क्रममा मृत्यु भएको हो।

पश्चिम दाङको हापुरेबाट बबई गाउँपालिका-४ चरकमटीयातर्फ आउँदै गरेको भे १ त ६०९१ नम्बरको ट्याक्टरले विपरीत दिशाबाट जाँदै गरेको रा १ प ६४९० नम्बरको मोटरसाइकललाई चरकमटियामा ठक्कर दिँदा बबर्इ-७ का ३० वर्षीय बस्नेत घाइते भएका थिए।

तुलसीपुरस्थित सिटी हस्पिटलमा उपचारका क्रममा मंगलबार दिउँसो मृत्यु भएपछि उनका आफन्तहरू आक्रोशित भएका हुन्। गम्भीर घाइते भएर अस्पताल भर्ना गरिएका बस्नेतलार्इ अन्य अस्पतालमा रिफर गर्न नपर्ने बताएको अस्पतालले केही समयपछि मृत घोषित गरेको थियो।

बस्नेतलार्इ मृत घोषित गरेलगत्तै आफन्त अक्रोशित बनेको बताइएको छ। प्रहरीले स्थितिलाई सामान्य बनाउने प्रयास गरिरहेको इलाका प्रहरी कार्यालय तुलसीपुरले जनाएको छ। आफन्तहरूले भने चिकित्सकको लापरवाहीका कारण बस्नेतको मृत्यु भएको भन्दै दोषी चिकित्सकलार्इ कारबाही गर्न माग गरेका छन्।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com