सबै सरकारी कार्यालयमा अनिवार्यरुपमा ट्वीटर सन्चालनको तयारी
प्रकाशित मिति : श्रावण ८, २०७५ मंगलबार
सरकारले सबै सरकारी कार्यालयमा अनिवार्यरुपमा सामाजिक सञ्जाल ‘ट्वीटर’ सन्चालन गर्ने तयारी थालेको छ ।
प्रधानमन्त्री तथा मन्त्रिपरिषद कार्यालयअन्तर्गतको ‘हेलो सरकारकक्ष’ले सबै सरकारी निकायले जनतासमक्ष सेवा र सूचना आदानप्रदान गर्नका लागि ट्वीटर सन्चालन गर्न तयारी थालिएको कक्षका प्रमुख प्रद्युम्नप्रसाद उपाध्यायले जानकारी दिए ।
उनले सरकारी कार्यालयले सबैलाई सूचना प्रदान गर्न, जनगुनासो ग्रहण गर्न र आफ्ना कार्यालयका सूचना सार्वजनिक गर्न ट्वीटर सन्चालन गर्न तयारी थालिएको बताए ।
यसअघि, सरकारको निर्देशनअनुसार सबै सरकारी कार्यालयले सामाजिक सञ्जाल फेसबुक सन्चालन गरिरहेका छन् ।
उपाध्यायकाअनुसार ट्वीटर सन्चालनका लागि सरकारले ‘सरकारी निकायद्वारा ट्वीटर खाता प्रयोग गर्ने कार्यविधि, २०७५’ समेत बनाउन थालेको छ ।
‘फेसबुकसँगै कार्यालयका सूचनालाई बढीभन्दा बढी प्रवाह गर्नका लागि ट्वीटर सन्चालन गर्ने तयारी गरेका हौं’–उनले भने–‘कतिपयले आफ्नै हिसाबले खोलेका छन् । ती सबैलाई एकरुपले सन्चालन गर्न कार्यविधि ल्याउन थालेका हौं ।’
उपसचिवसमेत रहेका उपाध्यायले कार्यविधिलाई चाँडै नै पारित गराइ सबै कार्यालयलाई ट्वीटर खाता सन्चालन गर्न निर्देशन दिने बताए ।
ट्वीटर खातामा प्रयोग हुने लोगो सरकारको वा संस्थाको हुनुपर्ने, ट्वीटर खाताको मुख्य पृष्ठमा राखिने फोटोले सम्बन्धित निकायको स्पस्ट परिचय दिने र उद्देश्य स्पस्ट पार्नेखालको हुनुपर्ने, ट्वीटर खाताको पेज आकर्षण र सेवाग्राहीमैत्री हुनुपर्ने कुरा कार्यविधिमा उल्लेख गरिएको छ ।
यसैगरी, ट्वीटर दैनिक सन्चालन गर्नुपर्ने, ट्वीटर सन्चालन गर्ने व्यक्ति तोकिनुपर्नेजस्ता कुरा कार्यविधिमा राखिएको छ ।
ट्वीटरमा आएका सूचनालाई लाइक, रिप्लाइ, ट्वीट, रिट्वीट, सेयर कस्तो गर्ने भन्ने सम्बन्धमा कार्यविधिमा उल्लेख गरिएको छ ।
उनकाअनुसार अहिले १० प्रतिशत कार्यालयलेमात्र ट्वीटर सन्चालन गरेका छन् ।