विवादास्पद भनाइपछि कानुन मन्त्री तामाङले दिए राजीनामा
प्रकाशित मिति : श्रावण ८, २०७५ मंगलबार
बंगलादेशमा डाक्टर पढ्ने नेपाली चेलीबारे विवादस्पद अभिव्यक्तिपछि विवादित बनेका कानुन न्याय तथा संसदीय मामिला मन्त्री शेरबहादुर तामाङले पदबाट राजीनामा दिएका छन्।
मन्त्री तामाङलाई सोमबार बेलुका बसेको नेपाल कम्युनिस्ट पार्टी (नेकपा) सचिवालय बैठकले पद त्याग्न निर्देशन दिए लगत्तै उनले मंगलबार राजीनामा दिएका हुन्। मन्त्री तामाङले मन्त्रालयमा पत्रकार सम्मेलन गरेर मंगलबार रुँदै राजीनामा दिएका हुन्।
सचिवालय बैठकको निर्देशनअनुसार तामाङले दिउँसो ३ बजे पत्रकार सम्मेलन गरी उनले पद त्याग गरेको घोषणा गरे। मन्त्री तामाङले बंलादेशमा डाक्टर पढ्न गएका नेपाली युवतीबारे आफूले गरेको विवादास्पद टिप्पणीप्रति आइतबार नै माफी मागिसकेका छन्।
मन्त्रालयमा आयोजित पत्रकार सम्मेलनमा उनले आफूले जीवनभर महिलाकै पक्षमा संघर्ष गरेको बताउँदै बंगलादेशमा अन्यायमा परेका नेपाली चेलीबारे बोल्दा केही शब्दका कारण परेको चोटप्रति माफी माग्दै पद त्याग गरेका हुन्।
विवादास्पद भनाइपछि कानुन मन्त्री तामाङले दिए राजीनामा
मन्त्री तामाङले प्रधानमन्त्री केपी शर्मा ओलीले चालेको समृद्धितर्फको यात्रालाई सफल बनाउन पनि आफूले नैतिकताका आधारमा पदमा बसिरहन उचित नठानेकाले बताए।
तामाङले आफ्नो छोटो कार्यकालमा १६ वटा भन्दा धेरै कानुन बनिसकेको बताउँदै यो अवसरका लागि प्रधानमन्त्री केपी शर्मा ओलीलाई धन्यवाद पनि दिए। तामाङले अदालतदेखि सरकारी निकायमा भइरहेको वैदेशिक लगानी एकद्वार प्रणालीबाट ल्याउन आफूले गरेको पहलका कारण केही पक्षले षड्यन्त्र गरेको पनि आरोप लगाए ।