११ हजार ६ सय १० जना नेपालीलाई अमेरिकाको ग्रिनकार्ड !
प्रकाशित मिति : श्रावण ८, २०७५ मंगलबार
गत आर्थिक बर्षमा झण्डै ४० हजार नेपालीहरु कानुनी रुपमा नै भिजिटर लगायतका गैरआप्रवासी भिसामा अमेरिका प्रवेश गरेको अमेरिकी सरकारको तथ्यांकले देखाएको छ । अमेरिकी सरकारको डिपार्टमेन्ट अफ होमल्याण्ड सेक्युरिटीको तथ्यांक अनुशार गत आर्थिक बर्षमा ३९ हजार ६१ जना नेपालीहरु बिभिन्न नाकाबाट कानुनी रुपमा गैरआप्रवासी भिसामा अमेरिका प्रवेश गरेका छन् । यो तथ्यांक आइ ९४ को आधारमा तयार गरिएको हो ।
पहिलो तीनमहिनामा ८ हजार ७ सय ८७ जना नेपालीहरु अमेरिका छिरेका थिए । राष्ट्रपति ट्रम्पले कार्यकाल सम्हालेपछिको तीनमहिनामा भने ७ हजार ५३ जना नेपालीहरु अमेरिका प्रवेश गरेका थिए । त्यसपछिको तेश्रो तीनमहिनामा १० हजार ३ सय ३८ नेपाली अमेरिकामा आए भने चौथो तीनमहिनाको अवधिमा १२ हजार ८८३ जना नेपालीहरु गैरआप्रवासी भिसामा अमेरिका आएमा थिए । आप्रवासी भिसामा अमेरिका आउनेहरुको विवरण अलग्गै रहेको छ ।
त्यो बाहेक गत आर्थिक बर्षमा अमेरिकी ग्रिनकार्ड पाउने नेपालीहरुको संख्या ११ हजार ६ सय १० रहेको थियो । जसमध्ये ग्रिनकार्ड पाउने गरी अमेरिका आउनेहरु ६ हजार ६४ जना रहेका थिए भने अमेरिकामा नै रहेर ग्रिनकार्डमा स्टेटस एड्जस्ट गर्नेहरु ५ हजार ५ सय ४६ जना रहेका थिए ।
गत आर्थिक बर्षको पहिलो तीनमहिनामा ३०३२, दोश्रो तीनमहिनामा २७९८, तेश्रो तीनमहिनामा ३०८७ र चौथो तीनमहिनामा २६९३ जना नेपालीहरुले अमेरिकाको ग्रिनकार्ड पाएका थिए । आर्थिक बर्ष २०१८ को पहिलो तीनमहिना मात्र २७६५ जना नेपालीहरुले अमेरिकी ग्रिनकार्ड पाएका छन् । जसमध्ये नयाँ आउनेहरु १५३० जना र स्टेटस एड्जस्ट गर्नेहरु १२ सय ३५ जना रहेका छन् ।
गत आर्थिक बर्षमा अमेरिकी नागरिकता लिने नेपालीहरुको संख्या ३ हजार ९ सय रहेको थियो । पहिलो तीनमहिनामा ४८९ जना, दोश्रो तीनमहिनामा ८८७ जना, तेश्रो तीनमहिनामा ११ सय ८० जना र चौथो तीनमहिनामा १३४४ नेपालीहरुले अमेरिकी नागरिकता लिए । आर्थिक बर्ष २०१८ सुरु भइसकेपछि पनि पहिलो तीनमहिनामा ७८५ जना नेपालीहरुले अमेरिकी नागरिकता लिइसकेका छन् ।