महानगरकै पैसाले मेयरलाई माला किन ?

हरिकृष्ण पन्थी (युरोप)

---

प्रकाशित मिति : श्रावण ६, २०७५ आईतबार

‘घरमा बा आउँदा माला लगाइदिनुहुन्छ, आमा आउँदा माला लगाइदिनुहुन्छ ? ’ उनले सोधे, ‘ श्रीमान् आउँदा माला लगाइदिनुहुन्छ कि श्रीमती आउँदा ? ’ उत्तर पनि उनैले दिए–विशेष पाहुना लगाइएला । महानगरपालिका, वडा र टोल त सबै एउटै परिवार हो भने मेयरलाई माला किन ? यस्तो प्रश्न अरू कसैले होइन मेयरकै हो, त्यो पनि पोखरा महानगरका मेयर मानबहादुर जिसीको ।

छोरेपाटन क्षेत्रमा सीसी क्यामेरा जडान कार्यक्रमको शनिबार बिहान उद्घाटनपछि प्रमुख अथितीय मन्तव्य राख्दै थिए मेयर जिसी । अरूलाई सम्मानपत्र हस्तान्तरण गरिसकेपछि आफूलाई पनि मायाको चिनो ग्रहणका लागि आयोजकले भनेपछि मन्तव्यका क्रममा मेयर जिसीले अनावश्यक खर्च नगर्न र मितव्ययी बन्न आग्रह गरे । ‘मलाई कार्यक्रममा बोलाउँदै माला नलगाइदिनू र मायाको चिनो पनि नदिनू भनेको हुँ’, जिसीले भने, ‘अहिले हामीले लगाइरहेको माला बुनेको फूल भारतबाट आउँछ । आयात किन बढाउने ? बरु हामी आफैंले फुलायौं भने लगाउँला ।’

महानगरबाट बजेट लगेर आफूलाई बोलाएको कार्यक्रममा माला लगाइदिने र मायाको चिनो दिने काममा खर्च नगर्न मेयर जिसीले आग्रह गरे । ‘झन् महानगरको कार्यक्रमलाई हो भनेपछि सय रुपैयाँ पर्ने मालालाई पनि ५ सय रुपैयाँ भन्दा रै’छन्’, उनले भने, ‘यस्ता कार्यक्रम गर्दा मालामा मात्रै ५÷६ हजार रुपैयाँ खर्च भएको हुन्छ । त्यसो नगरौं ।’ महानगरकै बजेट लगेका थुप्रै कार्यक्रममा त्यसरी नै खर्च भएको भन्दै उनले असन्तुष्टि पोखे ।

सिद्धार्थ राजमार्गको छोरेपाटन क्षेत्रमा १२ वटा सीसी क्यामेरा जडान भएको छ । डेभिज फल क्लबको सक्रियतामा पोखरा छोरेपाटनको बराल फिडदेखि छोरेपाटन प्रहरी चौकी हुँदै बरको चौतारासम्म एक किलोमिटरभन्दा बढी सडक क्षेत्रमा सीसी क्यामेरा जडान भएको हो । क्लबका पदाधिकारी ऋषि बरालका अनुसार १० लाख रुपैयाँ खर्च गरी क्यामेरा जोडिएको हो । त्यसमा महानगरले ३ लाख ८० हजार बजेट उपलब्ध गराएको छ । त्यस्तै गुप्तेश्वर गुफा व्यवस्थापन समितिले ३ लाख ५० हजार, बरालफिडले ५० हजार सहयोग गरेका थिए । २ लाख २० हजार रुपैयाँ भने क्लबले बेहोरेको क्लबका अध्यक्ष गोपाल बरालले जनाए ।

मेयरले शनिबार क्यामेरा उद्घाटन गरेका हुन् । उनले कार्यक्रममा आसनग्रहण गराउने जस्तो अति परम्परावादी शैली छाड्न पनि आग्रह गरे । मन्तव्य राख्दा व्यक्तिपिच्छे सम्बोधन गरिरहन नपर्ने पनि उनको भनाइ थियो । ‘कुर्सीमा नाम लेखिदिऔं, त्यहीँ गएर बसे भइहाल्यो’, उनले भने, ‘सम्बोधन गरेर समय किन खर्चने ? फलाना र ढिस्कानाको नाम लिँदा मेरो नलिने भनेर फेरि अर्काेले दागा धर्छ ।’ खर्च र समयको मितव्ययिताबारे बोल्दै जाँदा मेयरले सीसीटीभी राख्नुपरेको कारण पनि मानवीय प्रवृत्ति नै भएको बताए । उनले भने, ‘सबैले ममभन्दा नियम मान्ने हो भने सीसीटीभी पनि चाहिन्न घरमा ताला लगाउनु नि पर्दैन ।’