विश्वकै ठूलो बेइजिङ विमानस्थलमा अनुहार चिन्ने प्रविधी जडान हुने
प्रकाशित मिति : श्रावण २, २०७५ बुधबार
उच्च सुरक्षा सतर्कताका लागि बेइजिङको नयाँ विमानस्थलमा फेसियल रिकग्निसन (अनुहार चिन्ने) प्रविधी अपनाइने भएको छ।
चर्चित डिजाइनर जहा हादिदले विश्वकै ठूलो मानिएको बेइजिङको नयाँ विमानस्थल डिजाइन गरेकी हुन्। १२ खर्ब अमेरिकी डलर लगानीमा मध्य बेइजिङबाट ५० किलोमिटर दक्षिणमा निर्माण भइरहेको यो विमानस्थलबाट वर्षमा दश करोड यात्रुले सुविधा लिन सक्नेछन्।
यस विशाल विमानस्थलमा सीसी टिभीले यात्रुहरुको मुहार हेरेर उनीहरुको परिचयको तथ्यांक राख्ने प्रविधी प्रयोगमा ल्याउन लागिएको हो। यो प्रविधीले प्रत्येक व्यक्तिको परिचय खुलाउने भएकाले गलत आचरण भएका मानिसहरु विमानस्थलमा नकारात्मक कार्य गर्नबाट सचेत हुनेछन्।
बेइजिङको निर्माणाधिन नयाँ विमानस्थल
यात्रु तथा विमानस्थल सुरक्षाका लागि प्रयोगमा ल्याउन लागिएको फेसियल रिकग्निसन प्रविधीले विभिन्न घटनामा संलग्न मानिसहरु पहिचान गर्न मद्दत गर्नेछ। नयाँ प्रविधीको विकास र आविस्कार सम्बन्धी कामगर्दै आएको चिनियाँ प्रख्यात संस्था यिटुले जहा हादिदद्वारा डिजाइन गरिएको विमानस्थलमा यो प्रविधि प्रयोगमा ल्याउनेबारे बोलाबोलमा जाने तयारी थालेको छ।
चिनियाँ बजारमा यिटुको प्रतिस्पर्धी मानिएको सेन्स टाईम ग्रुपले समेत यस परियोजनामा बोलाबोल गर्ने तयारी गरेको साउथ चाइना मर्निङ पोष्टको रिपोर्टमा जनाइएको छ।
विमानस्थलका सम्पूर्ण गतिविधी क्यामराले निगरानी गर्ने हुनाले प्रविधी प्रयोगमा आए विमानस्थलमा हुने चोरी सहित संभावित दुर्घटना टर्ने विश्वास लिइएको छ।