विद्यार्थी भिसामा अमेरिका आउनेले अब सानो गल्तीगर्दा पनि देशनिकाला र प्रतिबन्ध
प्रकाशित मिति : असार १३, २०७५ बुधबार
अमेरिकी सरकारले ल्याउँदै गरेको नयाँ नियमले विद्यार्थी भिसामा अमेरिका आउनेहरु सानो गल्तीका कारणपनि देशनिकाला हुनसक्ने र पुन अमेरिका आउनका लागि १० बर्ष वा सधैका लागि प्रतिबन्ध लाग्नसक्ने खतरा देखिएको छ । आगामी अगस्त ९ देखि विद्यार्थी भिसामा आउनेहरुको गैरकानुनी उपस्थीतिको नयाँ मापदण्ड लागु गर्न लागिएकाले अब अमेरिकामा एफ, एम र जे भिसामा आउनेहरुले भिसाको उल्लंघन गरेको पत्ता लागेमा उनीहरुलाई देशनिकाला गरी ३ वा १० बर्षको प्रतिबन्ध सजिलै लाग्ने भएको छ ।
अमेरिकामा सार्वजनिक सुरक्षा समृद्ध गराउने सन्दर्भको अमेरिकी राष्ट्रपति डोनाल्ड ट्रम्पको कार्यकारी आदेश कार्यान्वयनका क्रममा नयाँ नियम ल्याइएको युएससीआईएसले जनाएको छ । यो नयाँ नियम एफ, जे र एम भिसामा अमेरिका आउनेहरु तथा उनीहरुका डिपेन्डेन्टहरुका सन्दर्भमा लागु हुने जनाइएको छ ।
युएससीआईएसका निर्देशक एल फ्रान्सिस सिसेनाले भनेका छन् –‘एफ, जे र एम लगायतका भिसामा अमेरिकामा आउनेहरु निश्चित उदेश्यका लागि आएका हुन्छन् । उनीहरु त्यो उद्देश्य पूरा भइसकेपछि अमेरिकाबाट उनीहरुका देशमा फिर्ता जार्नुपर्छ । वा उनीहरु अरु आप्रवासी स्टेटसका लागि प्रकृयामा जानुपर्छ । नयाँ नियमको सन्देश स्पष्ट छ कि कुनै पनि व्यक्तिले जुन प्रयोजनको भिसामा अमेरिका आएको हो, उसले त्यो भिसाका मापदण्डहरु पूरा गर्नुपर्छ । उनीहरुले भिसाका मापदण्ड उल्लंघन गर्न, ओभरस्टे बस्न वा गैरकानुनी रुपमा अमेरिकामा बस्न पाउनेछैनन् ।’
धेरै विद्यार्थीहरु अमेरिकामा आएर आफैले काम गरेर कलेजको शुल्क बुझाउने योजनामा हुन्छन् । तर अब अगस्त ९ पछि त्यस्तो गर्नु प्राय असम्भव हुनेछ । अन क्याम्पस हप्तामा २० घण्टाभन्दा बढी काम गरेको पाइएमा त्यस्ता विद्यार्थीहरु स्वतः देशनिकालाका लागि योग्य हुनेछन् । यदि ६ महिनाभन्दा धेरै त्यसरी काम गरेका रहेछन् भने उनीहरुमाथि अमेरिका पुन प्रवेशमा ३ बर्षसम्मको र १ बर्षभन्दा बढी काम गरेका रहेछन् भने १० बर्षसम्मको प्रतिबन्ध लाग्नेछ । खासगरी समर लगायतका विदामा नगदमा काम गर्ने विद्यार्थीहरुसमेत अब यो नियमको भागिदार हुनेछन् । तुरुन्तै उल्लंघन गरेको पत्ता नलागे जुनदिन पत्तो लाग्छ, त्यो दिन संकटको सामना गर्नुपर्नेछ ।
यसबारेको विस्तृत रिपोर्टको खसोखासको आगामी अंकमा प्रकाशित हुनेछ ।