अन्तिम समयमा टोनी क्रुसको फ्रि किक गोलले जोगियो जर्मनी
प्रकाशित मिति : असार ९, २०७५ शनिबार
स्विडेनविरुद्धको खेलमा टोनी क्रुसले अतिरिक्त समयको अन्तिम मिनेटमा गोल गरेपछि जर्मनी जोगिएको छ । जित्नै पर्ने दबाबका साथ मैदानमा उत्रेको जर्मनीले पहिले गोल खाएर पनि अन्तिममा आप्नो पक्षमा नतिजा पार्न सफल भएको हो ।
खेलको निर्धारित समय १–१ को बराबरीमा सकिएको अवस्थामा अतिरिक्त समयको पाँचौ मिनेटमा पाएको फ्रिकिकलाई टोनी क्रुसले सीधै स्विडेनको जाली चुमाएका थिए ।
यसअघि खेलको ३२ औँ मिनेटमा स्विडेनले अग्रता बनाएको थियो । स्विडेनलाई अग्रता दिलाउने क्रममा स्विडेनका लागि वला टोइभोनेनले काउन्टर एट्याकमा ३२ औँ मिनेटमा गोल गर्दै सनसनीपूर्ण अग्रता दिलाएका थिए ।
त्यसपछि दोस्रो हाफको तेस्रो मिनेटमा मार्को रेयुसलले गोल गरेपछि स्विडेनविरुद्ध जर्मनीले बराबरी गर्न सफल भएको थियो । स्विडेटको डी बक्समा अलमलिएको बललाई रेयुसले पोस्टको दिशा देखाएका थिए ।
यसअघि साविक विजेता जर्मनी विश्वकपको समूह चरणको दोस्रो खेलको सुरुवात पछि परेको थियो । स्विडेनविरुद्धको पहिलो हाफमा गोल खाएपछि सन् २०१४ को विश्व विजेता पछि परेको थियो ।
तर खेल १–१ को बराबरीमा रहेको अवस्थामा जर्मनीका मिडफिल्डिर जेरोमे बोटेङले दोहोरो पहेँलो कार्ड खाँदै मैदान छाडेका थिए । त्यसपछि जर्मनी दबाबमा परेको थियो तर अन्तिममा नतिजा आफ्नो पक्षमा पार्न सफल भयो ।
७० औँ मिनेटमा पहिलो पहेँलो कार्ड भेट्टाएका बोटेङले स्विडेनका खेलाडीलाई लडाएपछि खेलको ८२ औँ मिनेटमा रेफ्रीले अर्को पहेँलो कार्ड देखाउँदै मैदान बाहिर पठाएका थिए ।
पहिलो हाफमा गोल खाएपछि दोस्रो हाफमा उसले स्विडेनविरुद्ध बराबरी होइन जित नै दर्ता गर्नुपर्ने अवस्था अनुसार जर्मनीले नतिजा पनि निकालेको हो । स्विडेनले खेल सुरु भएको केकही बेरमै जर्मनीविरुद्ध गोलको गतिलो अवर गुमाएको थियो । जर्मनीले ७२ प्रतिशत बल पोजेसन बनाउन सकेको थियो ।
जर्मनीविरुद्ध पहिलो हाफको अन्तिम समयमा स्विडेनका मार्कुस ब्रेगले गरेको हेड बललाई म्यानुअल नुएरले पोस्टको दाहिनेतर्फ कठिन बचाउ गरेका थिए ।
स्विडेनविरुद्धको खेलमा जित दर्ता गराउन सफल भएपछि जर्मनीले २ खेलबाट ३ अंक बटुलेको छ, स्विडेनको पनि समान अंक छ । मेक्सिकोले २ खेलबाट ६ अंक बनाइसकेको छ । जर्मनी पहिलो खेलमा मेक्सिकोसँग १–० ले पराजित भएको थियो ।
मेक्सिकोले दक्षिणकोरियालाई आजै साँझ पराजित गर्दै ६ अंकसहित समूहको शीर्षस्थानमा उक्लिसकेको छ । यस्तोमा अबको अन्तिम खेलमा जर्मनीले दक्षिण कोरियासँग खेल्नेछ भने स्विडेनले मेक्सिकोसँग ।
