प्रधान सेनापति रानीमहलमा, रानीमहलको पर्यटकीय महत्वः प्रधान सेनापती क्षेत्री
प्रकाशित मिति : जेष्ठ २९, २०७५ मंगलबार
प्रधान सेनापति राजेन्द्र क्षेत्रीले पश्चिम जनरल कमाण्डर खड्ग शमसेरले बनाएको रानीमहल अवलोकन गरेका छन् । मंगलबार दिउँसो हेलिकप्टरबाट आएका सेनापती क्षेत्रीले रानीमहल संरक्षण गर्दै आएका स्थानीयहरुसँग अन्तरक्रिया समेत गरे ।
‘प्रेमको प्रतिकका रुपमा रहेको रानीमहल प्रत्यक्ष अवलोकनको अवसर मिलेको छ । यसको पुरात्वात्विक महत्वलाई जगेर्ना गर्नु आवश्यक हुन्छ,’ प्रधान सेनापति क्षेत्रीले भने, ‘ऐतिहासिक धरोहर पुरातात्विक तथा पर्यटकीय महत्व बोकेको छ । यसलाई व्यवस्थित तरिकाले समिति बनाएर संरक्षण गर्नुपर्छ ।’ अन्तरक्रियाका क्रममा स्थानीय बासिन्दाहरुले रानीमहललाई उचित रुपमा व्यवस्थापन गर्न सरकार गम्भिर नभएको बताएका थिए ।
विशेष सैनिक अभ्यासका क्रममा रानीमहल आईपुगेका प्रधान सेनापति क्षेत्रीले तालिममा सहभागी समूहलाई सम्बोधन गर्दै समूह सबैको लगावले उत्कृष्ट नतिजा हासिल हुने बताए । उनी भन्छन्, ‘पेशागत प्रतियोगितामा प्रथम हुने बटालियनबाट अन्तर्राष्ट्रिय स्तरमा हुने प्रतियोगितामा भाग लिन पठाईनेछ ।
हामी अन्तर्राष्ट्रिय स्तरमा समेत नाम राखेका छौं । भर्खर बेलायतमा सम्पन्न प्रतियोगितामा गोल्ड मेडल प्राप्त गरेका छौं । म सबैलाई बधाई दिन्छु ।’ अखण्ड सुनौलो इतिहासलाई जिवित राख्न नेपाली सेना सदैव तत्पर रहेको छ । प्रधान सेनापती क्षेत्रीले अत्यन्तै कठीन कार्य, विकट भौगोलिक बनावट, विपरित मौसमी अवस्थामा ३ दिन लगाएर सेना रानीमहलमा आएर आफ्नो उत्कृष्ठता प्रस्तुत गरेको बताए । नेपाली सेनाको नाम उच्च राख्नु आवश्यक छ, क्षेत्रीले भने । नेपाली सेनाको विशेष आन्तरिक पेशागत प्रतियोगिताका लागि नेपाल भरका विभिन्न सैनिक युनिटहरुबाट झण्डै तीन सय सैनिकहरु रानीमहल आईपुगेका थिए ।
तानसेन नगरपालिका–१३, बौहागुम्हामा रहेको रानीमहल १९५० सालमा पाल्पा गौडाका तैनाथवाला पश्चिम तर्फका प्रधान सेनापति खड्ग शमसेरले आफ्नी दिवंगत रानि तेजकुमारीको सदिक्षा र सम्झनामा निर्माण गरेका थिए । जिल्ला सदरमुकाम तानसेनदेखी १३ किलोमिटरको दूरीमा रानीमहल पुग्न सकिन्छ । सच्चा प्रेमको प्रतिक ठानिने रानिमहल त्यहि कारणले गर्दा दरबार अवलोकन गर्न जानेहरु मध्ये अधिकांश युगल जोडीहरु रहने गरेकाछन् ।
प्रणय दिवस (भ्यालेन्टाईन डे) फ्रेबुअरी १४ का दिन यस क्षेत्रमा मेलानै लाग्ने गर्दछ । १९५० सालमा शिलान्यास गरि १९५४ सालमा निर्माण सम्पन्न भएको थियो । कला कौशलको बेजोड नमूनाले सिंगारेर ४ वर्षको अवधिमा महत्वपूर्ण फर्निचर, महँगा महँगा सजावटका सामाग्रीले भरिपूर्ण कोठामा एक्लै रात बिताउँदा खड्ग समशेर कहिलेकहिले आफ्नी दिवंगत रानिलाई सम्झँदै भावविह्वल हुँदै मध्यरातमा रुँदै चिच्याउँथे भन्ने पनि गरिन्छ । चट्टान नै चट्टानले निर्मित पहाडको काखमा उत्तरवाहिनी कालीगण्डकी नदीको किनारमा निर्मीत दरवारले झण्डै १ सय २५ बर्षको ईतिहास बोकेर प्रगाढ प्रेमको इतिहासका रुपमा रहेको छ ।