१५ हजार विदेशी कामदार छान्न अमेरिकाले लोटरी गर्ने
अमेरिकी सरकारको युएससीआईएसले १५ हजार विदेशी कामदार छान्न लोटरी प्रणाली अपनाउने भएको छ । कृषि क्षेत्रबाहेक अन्य क्षेत्रका लागि अमेरिकाले हालै १५ हजार अस्थायी विदेशी कामदारको कोटा थपेको थियो । विदेशी कामदार आवश्यक भएका अमेरिकी बिजनेशहरुका लागि एच टु बी नामको भिसा संख्यामा थप गरिएको हो ।
थपिएका भिसाका लागि गत मे ३१ देखि आवेदन आउन सुरु गरेका थिए भने जुन ६ सम्म आवेदन लिइएको थियो । आवेदनका सुरुका ५ बिजनेश दिनमा नै १५ हजारभन्दा धेरै आवेदनहरु परेपछि कामदार छान्न लोटरी प्रणाली अपनाइने भएको हो ।
कम्प्युटरबाट लोटरी प्रणालीबाट छानिसकेपछि उनीहरुका बारेमा जानकारी गराउने युएससीआईएसले जनाएको छ । छनौटमा नपरेका आवेदनहरु युएससीआईएसले आवेदन शुल्कसहित नै फिर्ता गरिदिने भएको छ । जुन ६ पछि प्राप्त आवेदनहरुपनि युएससीआईएसले अस्वीकृत गर्दै आवेदकलाई नै फिर्ता पठाउने भएको छ ।
