अमेरिकाले थप विदेशी कामदारका लागि ढोका खोल्नसक्ने
प्रकाशित मिति : जेष्ठ २२, २०७५ मंगलबार
अमेरिकी सरकारले अझ धेरै विदेशी अस्थायी कामदारका लागि ढोका खोल्न विभिन्न उपायहरुको खोजी गरिरहेको छ । अमेरिकामा रहेका उद्योगहरुले अस्थायी रुपमा अझ धेरै विदेशी कामदारहरु भित्राउने मार्गहरु खोजिरहेको ह्वाइट हाउसका आर्थिक सल्लाहकार ल्यारी कुड्लोले जनाएका छन् ।
अमेरिकाको वेरोजगारी दर १८ बर्षमा नै सबैभन्दा कम भएको अवस्थामा अमेरिकन कम्पनीहरुमा काम गर्न थप कामदारहरु भित्राउने उपायहरु खोज्न थालिएको हो । गतसातामात्र ट्रम्प प्रशासनले अमेरिकी बिजनेशहरुलाई ढल्नबाट जोगाउन १५ हजार विदेशी कामदारहरुलाई अस्थायी भिसा दिने घोषणा गरेको थियो ।
समुन्द्री खानाको प्रशोधन गर्नेहरुदेखि होटल रेष्टुरेण्टका मालिकहरुले अमेरिकामा रहेका कामदारहरु अपुग रहेको गुनासो गरेपछि अस्थायी भिसाबारे ट्रम्प प्रशासनको ध्यानाकर्षण भएको हो । अमेरिकाभर विभिन्न प्रकारका ब्यापार, ट्रक ड्राइभर, मिस्त्री लगायतका कैयन पेशामा कामदारहरुको कमी भएको जनाइएको छ ।