प्रधानमन्त्री चीन जानुअघि नै गैंडा उपहार
प्रकाशित मिति : जेष्ठ २०, २०७५ आईतबार
प्रधानमन्त्री केपी शर्मा ओली चीन भ्रमण जानु अघि नै सरकारले चीनलाई जोडी गैंडा उपहार दिने तयारी गरेको छ । ओली असार पहिलो साता चीन भ्रमणमा जाँदैछन् ।
वन तथा वातावरण मन्त्री शक्तिबहादुर बस्नेत र मन्त्रालयका अधिकारीहरुले चीनीयाँ राजदूत यू होङलाई आइतबार गैंडा उपहारबारे सबै तयारी पूरा भएको जानकारी गराएको हो ।
मन्त्रालयको जैविक विविधता तथा वातावरण महाशाखा प्रमुख डा.महेश्वर ढकालले प्रधानमन्त्री चीन भ्रमणमा जानु अघि नै गैंडा उपहार दिन सकिनेबारे मन्त्रालयले राजदूतलाई जानकारी गराएको बताए ।
‘हामीले सबै तयारी पूरा गरिसकेकै छौँ भनेर भन्यौँ,’ ढकालले भने, ‘उहाँहरुले आफ्नो मन्त्रालयसँग छलफल गरेर समय तालिका जानकारी गराउनुहुनेछ ।’ दूतावासले आफ्नो मन्त्रालयसँग छलफल गरेर वन मन्त्रालयलाई समय तालिका जानकारी गराउनेछ । चीनियाँ हवाईजहाजमा काठको खोरमा राखेर गैंडा चीन लगिनेछ ।
सरकारले चीन सरकारलाई दुई जोडी गैंडा उपहार दिने घोषणा गरिसकेको छ । उपहार दिइने दुई जोडी गैंडा चितवनको सौराहाको बुमामा राखिएको छ । चितवन निकुञ्जका सुचना अधिकारी नुरेन्द्र अर्यालका अनुसार उपहार दिन लागिएका गैंडा डेढदेखि दुई वर्ष सम्मका छन् ।
एक आर्थिक वर्षमा कुनै पनि मुलुकलाई एक जोडी मात्र वन्यजन्तु उपहार दिन सकिने साईटिस ऐनमा व्यवस्था छ ।
त्यसैले पहिलो चरणमा चीनलाई एक जोडी गैंडा हस्तान्तरण गरिनेछ । प्रधानमन्त्री जानुअघि हस्तान्तरण नभए असार मसान्तअघि एक जोडी र नयाँ आर्थिक वर्ष सुरु भएलगत्तै अर्को जोडी प्रदान गर्न सकिनेगरी छलफल भएको पनि डा.ढकालले बताए ।