अमेरिकाको सरकारी परिभाषाबाट हटाइयो ‘आप्रवासीको देश’ शब्द
प्रकाशित मिति : फाल्गुन १३, २०७४ आईतबार
आप्रवासीहरुबाट बनेको देशका रुपमा परिचित अमेरिकाको सरकारी मिसन वक्तब्यबाट ‘आप्रवासीको देश’ भन्ने शब्द नै हटाइएको छ । अमेरिकी नागरिकता र ग्रिनकार्डका लागि काम गर्ने एजेन्सी युएससीआईएसको मिसन वक्तब्यबाट ‘आप्रवासीको देश’ शब्द हटाइएको हो ।
आधिकारिक मिसन स्टेटमेन्टबाट ‘आप्रवासीको देश’ भन्ने शब्द हटाएपछि अब अमेरिकाले औपचारिक रुपमा आप्रवासीको देशका रुपमा रहेको परिचय बदलेको छ । युएससीआईएसले किन ‘आप्रवासीको देश’ शब्द हटाएको हो भन्नेबारेमा कुनै स्पष्ट पारेको छैन ।
युएससीआईएसका निर्देशक एल फ्रान्सिस सिसेनाले कर्मचारीहरुलाई पत्र लेख्दै नयाँ मिसन स्टेटमेन्टले अमेरिकाको अध्यागमन प्रणालीमा युएससीआईएसको भूमिका स्पष्टरुपमा परिभाषित गरेको बताएका छन् । सिसेना गतबर्ष ट्रम्प निर्वाचित भएलगत्तै युएससीआईएसको निर्देशक भएका थिए ।
नयाँ मिसन स्टेटमेन्टबाट भिसा वा अध्यागमन सुविधाका आवेदकलाई भनिदै आएको ग्राहक शब्द पनि हटाइएको छ । यसअगाडिको स्टेटमेन्टमा भिसा वा अध्यागमन सुविधाका आवेदकलाई ग्राहक भनिदै आएको थियो ।