१८ लाख कागजपत्रविहिनलाई अमेरिकी नागरिकताको बाटोमा लैजाने बिल सोमबार पेश गरिदै
प्रकाशित मिति : माघ २९, २०७४ सोमबार
अमेरिकामा रहेका झण्डै १८ लाख कागजपत्रविहिनहरुलाई अमेरिकी नागरिकताको बाटोमा लैजाने प्रस्ताव सहितको बिल सोमबार सदनमा पेश गरिने भएको छ । रिपब्लिकन सिनेटरहरुको एउटा समुहले बाल्यकालमा अमेरिका आएका झण्डै १८ लाख योग्य कागजपत्रविहिनलाई अमेरिकी नागरिकताको बाटोमा लैजाने प्रस्ताव सहितको बिल पेश गर्न लागेका हुन् । बिलमा सिमा सुरक्षाका लागि २५ बिलियन डलरको प्रस्ताव पनि राखिने जनाइएको छ ।
सेक्युअर एण्ड सक्सिड नाम दिइएको उक्त ऐनको को स्पोन्सर सिनेटरहरु चक ग्रासले, जेम्स ल्यांकफोर्ड, जोनी अर्नेस्ट, टम कटन, जोन कर्नेन, थोम टिलिस र डेभिड पर्डयुले गरिरहेका छन् । सिनेटर चक ग्रासलेले वास्तविक समस्याको समाधान र राष्ट्रको सुरक्षाका दिशामा यो एउटा दुर्लभ अवशर हुने बताएका छन् ।
यो बिलले नजिकका नातेदार समेत अमेरिका ल्याउन सकिने चेन माइग्रेशनलाई साँगुरो बनाउनेछ । साथै डिभी लोटरीको अन्त्यको विषय पनि बिलमा राखिएको जनाइएको छ । सोमबार पेश गरिने भनिएको बिलको विस्तृत खाका आइनसकेपनि यसले ट्रम्पको चारखम्बे अध्यागमन नीतिलाई कार्यान्वयन गर्ने बताइएको छ ।