अमेरिका आउनेको जाँचमा कडाई गर्न अब अमेरिकामा छुट्टै राष्ट्रिय परिक्षण केन्द्र
प्रकाशित मिति : माघ २९, २०७४ सोमबार
अमेरिका आउने व्यक्तिको सुरक्षा जाँचका अमेरिकी सरकारले छुट्टै राष्ट्रिय परिक्षण केन्द्रको स्थापना गर्ने भएको छ । राष्ट्रपति डोनाल्ड ट्रम्पले त्यस्तो केन्द्रको स्थापनाका लागि होमल्याण्ड सेक्युरिटीका नाममा निर्देशन जारी गरेका हुन् । राष्ट्रपतिको निर्देशनपछि डिपार्टमेन्ट अफ होमल्याण्ड सेक्युरिटीभित्र नेशनल भेटिङ सेन्टर स्थापना गरिने होमल्याण्ड सेक्युरिटीका सेक्रेटरीले जानकारी दिएका छन् ।
अमेरिकनको संरक्षण र सुरक्षाका लागि विश्वब्यापी प्रतिबन्धहरु बढाउने राष्ट्रपति ट्रम्पको कार्ययोजना अनरुप नै अमेरिका आउने व्यक्तिको सुरक्षा जाँचमा अत्यन्तै कडाईका लागि नेशनल भेटिङ सेन्टर स्थापना गरिने होमल्याण्ड सेक्युरिटीका सेक्रेटरीको भनाई छ ।
नेशनल भेटिङ सेन्टरले आतंकवादी, अपराधी र खतरनाक व्यक्तिलाई अमेरिकाको किनारासम्म आउनमा नै रोक्नकालागि डिपार्टमेन्ट अफ होमल्याण्ड सेक्युरिटीसँग र अमेरिकाको सबै खुफिया एजेन्सीहरुसँग मिलेर काम गर्नेछ । सेन्टरले अमेरिका आउने व्यक्तिका बारेमा विभिन्न एजेन्सीहरुलाई अद्यावधिक सुचना प्रवाह गर्नुका साथै उक्त व्यक्ति अमेरिकाका लागि खतरा रहे नरहेको पत्ता लगाउनेछ ।
नेशनल भेटिङ सेन्टरले अमेरिकी भिसाका आवेदक, भिसा वेभर चाहनेहरु, अध्यागमन सुविधा चाहनेहरु, अमेरिका प्रवेश गर्न प्रयास गर्नेहरुमध्येबाट अपराधी, आतंकबादी र खतरनाक व्यक्तिको पहिचान गर्नेछ । आगामी ६ महिनाभित्र सेन्टरको स्थापना गरेर काम सुचारु गरिनेछ ।