‘तथ्यमा आधारित रहेर नेपालको टीपीएस पुनरावलोकन गर्नेछौं ‘ : अमेरिकी उपसहायक विदेशमन्त्री
अमेरिकाको प्रमुख उपसहायक विदेशमन्त्री एलिस जी वेल्सले अमेरिकामा रहेका नेपालीहरुलाई प्रदान गरिएको टेम्पोरेरी प्रोटेक्टेड स्टेटस टीपीएसको अवधि थप्ने वा नथप्ने सन्दर्भमा तथ्यमा आधारित रहेर पुनरावलोकन गर्ने बताउनुभएको छ । उहाँले टीपीएसको अवधि थप्ने वा नथप्ने सन्दर्भमा निष्पक्ष ढंगले र तथ्यमा आधारित रहेर पुनरावलोकन गर्ने स्पष्ट पार्नुभयो ।
दक्षिण तथा मध्य एसिया मामिला हेर्ने प्रमुख उपसहायक विदेशमन्त्री एलिस जी वेल्सले यसविषयमा हालै अमेरिकाका लागि नेपाली राजदूत अर्जुनबहादुर कार्कीसँग पनि छलफल भएको जानकारी दिनुभयो । आफूसँगको भेटमा कार्कीले टीपीएसको विषय उठाउनुभएको उहाँले बताउनुभयो ।
बीबीसीको विश्व स्टुडियो लण्डनमा बीबीसी संबाददाता भागिरथ योगीसँग कुरा गर्दै वेल्सले भन्नुभयो – ‘टीपीएसबारे हाम्रो होमल्याण्ड सेक्युरिटीले हेरिरहेको छ । हामीले कुनै मुलुकले आफ्ना जनतालाई प्रयाप्त संरक्षण दिन सकिरहेको छैन भन्ने निधो गरेमा त्यहाको जनतालाई टीपीएस दिन्छौं । यो एउटा अस्थायी प्रकृया हो र पुनरावलोकन प्रकृया नेपाल आफ्ना नागरिकलाई फिर्ता लिन सक्षम छ कि छैन भन्नेमा केन्द्रीत रहनेछ । यो नियमबाट कति नेपाली लाभावान्वित भए भन्ने हाम्रो छुट्टै मुल्यांकन छ ।’
कुराकानीका क्रममा उहाँले अमेरिकाले नेपालसँगको सम्बन्धलाई निकै महत्व दिएको बताउनुभयो । नेपालमा कम्युनिष्ट सरकार गठन गर्न लागेकोमा अमेरिका चिन्तित छ ? भन्ने प्रश्नको जवाफमा उहाँले भन्नुभयो – ‘हामी नेपाली जनताको इच्छालाई प्रतिनिधित्व गर्ने वैधानिक सरकारसँग काम गर्न इच्छुक छौं । हामीले यो चुनावलाई अमेरिकाबिरुद्धको जनमतसंग्रहका रुपमा हेरेका छैनौं । हामीले यसलाई प्रजातान्त्रिक अभ्यासका रुपमा हेरेका छौं । नयाँ सरकारसँग काम गर्न इच्छुक छौं ।’
